Reportajen Ato ‘Lekinawa’ Costa
Jornalista ho media nia lideransa balun iha ASEAN partisipa iha ASEAN Media Forum (AMF) halo iha 31 Outubru 2023, Jakarta. Iha Forum ne’e partisipa mos hosi media balun hosi Timor-Leste no Forum ne’e dedika sesaun ida mak espesialmente koalia kona ba adezaun Timor-Leste nian ba sai membru ida hosi ASEAN.
Iha abertura Ministra Negosiu Estranjeiru Indonesia, Retno Marsudi esplika katak fo benvindo no hato’o komitmentu atu kontinua fo apoio ba hakonu kriteriu Road Map nian.
“ASEAN fo benvindu ba Timor-Leste mai familia ASEAN nian. Dalan ba adezaun naruk tebes, hahu kedas hosi 2011, maibe ASEAN sei apoio Timor-Leste hodi priense kriteria sira iha Road Map mak adopta tiha ona”, Ministrs Retno esplika.
Iha konversa ho Chair-Person ba ASEAN tinan ida ne’e, Ministra Negosiu Estranjeiru Indonesia nian, Retno Marsudi mos hato’o kona ba dezenvolvimentu situasaun konflitu iha Gaza, Palestina no ema ASEAN sira mak oras ne’e dadaun sei iha Gaza labele evakua hosi neba tan konflitu nebe akontese. Ba ASEAN, Ministra Retno hato’o katak sorte bot tebes tanba ASEAN goza situasaun hakmatek iha dekada lima nia laran ona no ASEAN presija halo serbisu makas hodi mantein ida ne’e.
“Ita presija ASEAN laos deit atu resolve problema prezente nian maibe mos dezafiu sira maki ha future mai. Asuntu Myanmar nian kontinua hatudu dezafiu. ASEAN halo ona esforsu ho pontu 5 kona ba consensus ba Myanmar nian. Engazamentu stakeholder mos halao hela dadaun iha Myanmar. Maibe to’o agora seidauk iha sinal katak dialogu inkluzivu iha nivel nasional Myanmar bele halao, Ministra Retno esplika.
Forum ida ne’e loke hosi Sekretariu Jeral ASEAN nian, Dr. Kao Kim Hourn ho Ambasador Republika Federal ba ASEAN ho Timor-Leste, Ina Lepel. Partisipante hosi Timor-Leste mak media Neon Metin, AJTL, Tatoli, no Radio Liberdade.
