Reportajen David da Costa
Asosiasaun Akademika Estudantil Fakuldade Medicina Ciencia da Saude(AAE-FMCS) husu ba Magnifiku Reitór UNTL João Soares Martins, urjentimente atu loke proses disiplinar hasoru Diretor ESTeS Professor Miguel Soares ne’ebe aproveita estudante sira hodi hetan lukru atu satisfaz deit nia nesesidade pesoal no ameasa estudante. No loke mós prosesu disiplinar hasoru Diretor Departamentu Parteira Professor Rafael dos Santos ne’ebe kansela estudante nain 3 la tun estagiu maski estudante nain 3 ne’e priense ona rekezitus estagiu nian.
Portavoz Voz Estudante, Germano dos Santos Moreira, hatete, Asosiasaun Akademika Estudantil Fakuldade Medicina Ciencia da Saude(AAE-FMCS) hakarak afirma dala ida tan ba públiku katak denunsia públika ida ne’e nu’udar kontinuasaun denunsia públika ne’ebe halo ona iha loron, 29 abril iha Universidade Nascional Timor Lorosa’e, tanba Asosiasaun Akademika FMCS nota katak, estrutura universidade no departamentu tenta abandona kazu ne’ebe Asosiasaun Akademika submete, maski Asosiasaun Akademika halo ona esforsu lubuk, liu husi submisaun karta, enkontru direita, maibé to’o agora ladauk iha resposta ba kazu hirak ne’e.
Ho aktu iresponsabilidade ida ne’e, Asosiasaun Akademika Fakuldade Medicina e Ciencia da Saude (AAE-FMCS) konsidera Magnifiku Reitór iha kompetensia tomak, atu halo abertura ba prosesu disiplinar, maibé iha kazu refere Magnifiku Reitór tenta ignora, ida ne’e hatudu katak, orgaun universidade nian la halo ona tratamentu justu no igual ba komunidade akademika, maibé sai fali kolaborador ba pratikante sira iha UNTL.
“Dignisima Dekana Fakuldade Medicina e Ciencia da Saude professora Lidia Gomes hatudu nia inkapasidade no sai protetor ba professor balun ne’ebe pratika kazu asediu sexual, kobransa ilegal no violadores normas UNTL nian, ida ne’e hatudu katak dekana rasik admite atu kazu hirak ne’e akontese, maski ita nia prinsipiu,valores no regulamentu sira bandu atu labele akontese iha universidade,” dehan Porta voz Estudante Germano liuhusi Konferénsia Imprensa iha kampus UNTL Kaikoli, Dili Segunda 12/05.
Nune’e, Diretór Departamentu Parteira ho nia profesor sira, halo departamentu hanesan los sira nia kompainia unipesoal Lda, iha ne’ebe sira limita estudante atu labele ba estagiu maski estudante sira prense rekezitus estagiu nian, ida ne`e hatudu katak diretor ho nia subordinadu sira uza ambiente akademika sai fatin ba ameasa estudante sira, fatin ba odiu vigansa no fatin atu limita estudante nia direitu.
Diretór ESTeS Miguel Soares senti alergia ho estudante sira nia kritika, tanba tinan barak diretor aproveita departamentu sai hanesan fatin negosiu no fatin atu hetan lukru, ida ne’e violasaun grave ne’ebe akontese iha departamentu maibe diretór refere konsiente hanesan baibain no sai ona nia tradisaun.
Tanba ne’e, Hakarak rekomenda ba magnifiku Reitór UNTL, atu foti medidas urjenti ba kazu Fakuldade Medicina e Ciencia da Saude no xamada urjentimente ba Dekana Fakuldade Medicina Ciencia da Saude, Professora Lídia Gomes, Diretor Departamentu Parteira Professor Rafael no Diretór ESTeS Miguel Soares iha ne’ebe tenta ignora kazu ne’ebe estudante sira hasoru.
“Husu ba Magnifiku Reitor UNTL, atu urjentimente loke prosesu disiplinar hasoru Diretor ESTeS iha ne’ebe aproveita estudante sira hodi hetan lukru atu satisfaz deit nia nesesidade pesoal no ameasa estudante. No loke mos prosesu disiplinar hasoru Diretor Departamentu Parteira iha ne’ebe kansela estudante nain 3 la tun estagiu maski estudante nain 3 ne’e priense ona rekezitus estagiu nian,” Sira husu ba Reitór.
No Husu mós ba diretór departamentu ESTeS Miguel Soares, atu fo fila save ofice asosiasaun akademika departamentu ESTeS nian ne’ebe hadau iha loron 29 abril ne’e, nune’e husu atu entrega fila fali save asosiasaun akademika nian ba reprezentante estudante.
“Husu ba Diretór Departamentu ESTeS Miguel Soares no Diretór Departamentu Parteira Rafael dos Santos atu rejigna an husi kargu diretór tanba ita bot nain 2 nia aktu la reflete hanesan manorin diak iha FMCS UNTL,” Sira husu.
Sira mós husu ba sivista akademika Fakuldade Medicina e Ciencia da Saude (FMCS) atu hamutuk ho asosiasaun akademika hodi hateten lae ba esplorasaun iha kampus no limita atu profesor sira labele viola estudante sira nia direitu.
Senadu Fakuldade Medicina Ciencia da Saude (FMCS), Ronaldo José Galucho do Rego, mos hatete, kazu ne’e Asosiasaun Akademika Estudantil Fakuldade Medicina Ciencia da Saude (AAE-FMCS) hato’o ona ba Reitór Universidade UNTL nian, maibé infelizmente nia delega fali Dekana Fakuldade Medicina nian atu resolve problema hirak ne’ebe, mas Dekana laiha seriedade atu resolve problema. Ho ida ne’e AAE-FMCS mós hato’o ona keixa ba iha Provedór Direitus Umanus e Justisa atu haree kazu ne’e.
“kazu ida ne’e ami hatama tiha ona ba iha Magnifiku Reitór, maibé ate agora seidauk iha resposta, delega fila fali Dekana Fakuldade atu rezolve problema refere, maibé ita nia Dekana la tau seriedade, Tanba ne’e, ami mos hato’o ona keixa ba iha Provedór Direitus Umanus e Justisa (PDHJ) no ami hein fali xamada husi PDHJ atu kontinua prosesa kazu ne’ebe iha,” Nia esplika.
Sei solusaun maka laiha Asosiasaun Akademika Fakuldade sia 9, atu apoiu Asosiasaun Akademika Fakuldade Medicina e Ciencia da Saude (FMCS) hodi blokeia funcionamentu Fakuldade Medicina e Ciencia da Saude, karik estrutura la hola medida ruma iha loron 3 nia laran.
Relasiona ho Kazu ida ne’e, Jornalista sira tenta komfirma ho Magnifiku Reitór Universidade Nasionál Timor-Lorosa’e (UNTL) João Soares Martins, Maibé nia lakoi fó informasaun ba jornalista sira kona-ba kazu sira ne’ebe akontese iha universidade liu-liu iha Fakuldade Medicina eCiencia da Saude.
