Reportajen David Da Costa
Primeiru-Ministru, Kay Rala Xanana Gusmão hala’o reniaun urjensia ho Komandante Jerál Polísia Nasionál Timor-Leste (PNTL), Komisariu Jerál Polisia, Henrique da Costa no Segundu Komandante Jerál PNTL, Komisariu Polísia Pedro Belo, hodi fó orientasaun ba Komandu PNTL ho apoiu Komandu F-FDTL nian atu solusiona konflitu entre Grupu Arte Marsiál (GAM) no Grupu Arte Rituál (GAR) iha Suku Lourba no Suku Carabau, Postu Administrativu Bobonaro, Munisipiu Bobonaro.
Iha komunikadu Imprensa ne’ebé Neon Metin sita husi media Gabainete Primeiru-Ministru kay Rala Xanana Gusmão katak, PM Xanana preokupa no triste tebes ba konfrontu fízika entre grupu juventude sira ne’ebé akontese, sesta (03/11/2023) lokoraik rezulta ema na’in-hitu (7) kanek no uma haat hetan sunu, kioske rua (2) ho uma ualu (8) hetan estragu (baku rahun) hodi halo populasaun halai no trauma.
Nune’e Xefe Governu promote iha semana ne’e liu hosi reniaun Konsellu Ministru sei taka Organizasaun Arte Marsiál no Grupu Arte Rituál hodi evita konflitu ne’e labele kontinua akontese bebeik ba munisipiu seluk.
“Ita triste tebes sira tuda malu, sunu uma iha Bobonaro parte Lourba no Carabau, tanba ne’e polisia tenki reforsa seguransa. Ha’u sei realiza renian kuarte-feira agora iha Konsellu Ministru, tanba nu’udar Primeiru Ministru ha’u labele aseita katak, ita hosik nafatin arte marmarsiál sira estraga ita nia sosiedade, Konsellu Ministru sei taka tiha grupu arte marsiál sira no grupu arte rituál sira,” dehan PM Xanana iha Komunidadu Imprensa ne’ebé Neon Metin asesu husi Gabainete Primeiru Ministru Xanana, Sabadu 4/11.
Nia mós husu ba PNTL liu hosi Ofisiál Polisia Suku (OPS) atu koopera ho autoridae suku, Igreja no Lia Nain no Juventude sira hodi hala’o kedas dialogu ba dame entre parte hirak ne’ebé komete problema iha suku Lourba no Carabau. No Xanana orienta PNTL atu kaputra hotu oknum juventude hirak ne’ebé envolve hodi responsabiliza ba krime ne’ebé sira komete.
Xefe governu alerta mós ba responsabel GAM no GAR kuandu la kontrola sira nia membru halo nafatin krime, governu sei hatun orden hodi kaer maka lider sira ne’e.
Iha parte seluk, PM Xanana promote sei bolu membru PNTL no F-FDTL sira ne’ebé envolve iha grupu GAM no GAR sei halo juramentu jerál hodi sai para halo servisu ho independente.
“Ba membru PNTL no F-FDTL para para indentifika la’òs kartigu, indentifika polisia no F-FDTL hotu- hotu ne’ebé partense ba GAM no GAR iha loron 28 Novembru 2023 halo juramentu hodi sai hosi grupu para defende povu,” PM alerta iha komunidadu Imprensa ne’e.
PM husu mós ba Padre sira iha Igreja Katolika hotu- hotu atu halo misa ba dame hodi lori mensajen paz ba juventude hotu- hotu.
Iha fatin hanesan, Komisariu Jerál Polisia, Henrique da Costa informa Komandu hatun ona membru PNTL koopera ho PNTL hodi halo atuasaun no hari postu seguransa provizoriu hodi evita konflitu iha suku Lourba no Carabau.
PNTL halo ona indentifikasaun ba vitima balun ne’ebé kanek deskunfia sai mós nu’udar suspeitu ba konflitu no sei buka hodi kaer tan hirak ne’ebé halai.
Entretantu, hafoin enkontru, PM Xanana ho ninia Corpu Seguransa Pesoál (CSP) ba kompres kedas sasan bazika hodi desloka ba Bobonaro hodi lori apoia umanitaria fó apoiu uluk ba vitima sira, liu-liu labarik no ferik no katuas sira.
