Reportajen Agustinha Amaral
Sobrevivente Luisa Raimunda Soares, konta nia istória katak, iha loron 12 Novembru tinan 1991 ne’ebé akontese trajedia iha Semitériu Santa Cruz, nia partisipa hanesan joven ida, maske ho idade ki’ik nia envolve iha grupu Eskuteiru iha igreja Motael hanesan mos aluna Esternatu ida, maibé la espera katak atu akontese trajedia ne’e.
Sobrevivente ne’e konta tan, nia sai hosi uma hatene atu ba misa, depois sai husi misa sira forma iha igreja hodi akompaña ho orasaun ba Semitériu Santa Kruz inklui mos ho joven barak mak ohin loron sai mate restu hosi trajedia ne’e.
“Ami la’o husi Motael akompaña ho orasaun kontinua ho joven barak hakilar Viva Timor-Leste ukun rasik aan, lori to’o fatin lulik Santa Kruz iha 10:00, oras akontese iha fatin ne’e hodi sai istória ba mundu katak husi ida ne’e mak Timor buka ukun rasik aan”, konta Luisa Raimunda Soares ba Neon Metin iha komemorasaun loron Masakre Santa Kruz, iha Simitériu Santa Kruz, 12/11.
Nia hatutan, Komemora loron 12 Novembru ne’e, ohin ba dala 32 maske barak mak laiha maibé sira hamutuk ho sira nia belun mate restu seluk, nia sente triste no fuan moras tanba laiha prezensa husi kolega ne’ebé sosa isin, ran no ruin to’o agora seidauk hetan.
“Ha’u partisipa iha 12 Novembru ne’e ho idade 14 anos sai hanesan ema bai-bain, la hanoin saida mak akontese tanba ha’u ho idade ne’e, envolve iha asosiasaun eskuteriu la hanoin saída mak akontese iha momentu ne’eba la sente, maibé ikus mai akontese duni inklui sai vítima, tanba ha’u mai to’o fatin lulik ida ne’e kilat tarutu mak ami foin namkari”, nia konta tuir.
Tuir nia haree, feto ida agora ho uluk diferente tebes hanesan feto ida uluk, feto uluk maske ho idade ki’ik mais brani maibé sentimentu la hanesan ho feto ida agora tanba buat hotu mudansa ho matenek.
