Reportajen Silvino Freitas
Forum Komunikasaun Feto Timor Leste (FOKUPERS) hala’o briefing ba média sira, hodi informa kona-ba alokasaun Orsamentu Jerál Estadu (OJE) tinan 2024 ba polítika estadu kona-ba igualidade jéneru no inkluzaun, nune’e orsamentu ba tinan 2024 nia alokasaun la duun justu, tanba labele halo atendimentu ne’ebé di’ak ba vitíma violénsia bazeia ba jéneru, orfanatu no ema ho difisénsia sira ne’ebé instituisaun solidaridade sosiál dadaun ne’e tau matan.
Tuir Diretora FOKUPERS, Maria Guterres hateten, média briefing ne’ebé FOKUPERS realiza ne’e parte importante atu informa ba jornalista sira kona-ba alokasaun orsamentu jerál estadu bá tinan 2024 sensivel ba jéneru, hodi responde polítika estadu nian kona-ba igualidade jéneru, nune’e média sira bele apaar orsamentu refere.
“Iha tinan kotuk ita konsege hetan $2 milloes ne’ebé aloka ba instituisaun solidaridade sosiál hamutuk 30 resin, maibé iha tinan ida ne’e orsamentu ne’e tuun fila fali ba $1.4 milloes ne’ebé sei fahe bá instituisaun solidaridade sosiál 37 iha Timor laran tomak, nune’e ita fahe didi’ak kada instituisaun hetan de’it $30.000” dehan Diretora FOKUPERS Maria Guterres hafoin média briefing iha Faról, (11/12).
Nia dehan, husi alokasaun orsamentu refere la justu husi Ministériu Solidaridade Sosiál, tanba iha kada instituisaun vitíma idak-idak sira han $1.50 centavo ba kada vitíma bá kada loron, nune’e liga fila fali ba polítika Prezidente nian atu hadi’a no hasa’e nutrisaun iha rai laran tanba vitíma sira ne’ebé bá iha uma mahon no sentru orfanatu ema ho difisiénte sira sei hetan nutrisaun di’ak maibé ho alokasaun orsamentu ne’ebé iha bele prejudika ba atendimentu instituisaun solidaridade sosiál, nune’e mós atendimentu ba vitíma sira dalaruma mai ho númeru ne’ebé barak maibé alokasaun orsamentu ki’ik tanba ne’e instituisaun solidaridade sosiál presiza halo proposta hodi hatama fali ba doadór sira atu bele hetan apoiu, maibé ida ne’e bele prejudika fali bá instituisaun solidaridade sosiál nia prestasaun servisu.
“Hau hanoin povu baibain de’it kestiona tiha ona kona-ba asuntu ida sa tan organizasaun sira ne’ebé servisu ba asuntu ida nee, tanba ne’e ha’u mós hakarak lori de’it vitíma sira nia lian bainhira sira iha uma mahon sira akompaña notísia sira tristi hodi husi ami atu hato’o sira nia lian ba nai ulun sira” dehan Diretora FOKUPERS.
