Reportajen Umbelina dos Reis
Asistente treinadora hosi grupu Kostura Inkluzivu, Raes Hadomi Timor oan (RHTO), Lucia da Costa, hateten, objetivu inklina aan iha organizasaun RHTO, ne’e oinsá Ema ho Defisiénsia (EhD), ne’ebé mais vulneravel liu ne’e bele inklina aan iha laran liu hosi grupu tolu mak hanesan Kostura, Resiklajen no Modifikasaun motor ba motor roda tolu, ho objetivu oinsá kapasita no halo mudansa ba dezenvolvimentu Ema ho Defisiénsia sira iha baze.
“Vizaun ami haree EhD kontinua sai vulneravel iha baze no suku, nune’e ami hakarak kapasita nafatin EhD sira nia pensamentu no skill nune’e sira kria rasik servisu ba sira nia aan. Misaun ami hakarak maluk defisiénsia hala’o rasik ami nia atividade” dehan Lucia Da Costa iha Fundasaun Haburas, tersa-feira 19/12.
Nia konta, halo resiklazen lixu sai fali valor ekonómiku ba moris ne’e dala ruma hein ema loke pameran hafoin ba fa’an entaun loron ida hetan rendimentu $1,00 ou $2,00 maibé hosi parte kostura kada loron ida másimu bele hetan $80,00, rendimentu ne’ebé hetan hosi atividade fa’an ne’e atu rai iha peti kas nune’e loron ida fallansu ba proposta no orsamentu refere karik, ami kontinuasaun ba ami nia kursu Kostura Inkluzivu ne’ebe agora da-dauk prepera ba maluk defisiénsia. Kursu refere durasaun fulan neen (6) ho gratuita no maluk defisiénsia sira ne’ebe tuir kursu ne’e kada fulan hetan $50,00 hodi asesu ba transporte, maluk defisiénsia sira ne’ebe tuir kursu Kostura Inkluzivu total hamutuk 14 pessoas.
“Pesoalmente ha’u hetan benefísiu barak bainhira tama iha organizasaun RHTO no liu hosi grupu Kostura Inkluzivu ne’e sente kontente tebes, tanba bainhira ha’u hakat ain hosi Bobonaro mai iha sidade Díli seidauk hatene saida mak kostura konaba suku ropa sira ne’e. Entaun inklina aan tiha iha grupu Kostura Inkluzivu ne’e hau komesa aprende no suku rasik ha’u nia vestidu ho tais, entaun ha’u sente kontente no orgullu tanba bele dehan konaba iha área kostura suku ropa nian 95%, maibé difikuldade mak laiha kbiit ekonomia atu hamriik mesak.” Nia dehan.
Ema ne’ebe inklina aan iha organizasaun RHTO liu hosi grupu Kostura Inkluzivu total 28, mane na’in tolu, feto na’in rua nulu resin lima (25).
