Reportajen Umbelina dos Reis
Ho preokupasaun públiku nian konaba seriedade situasaun setor saúde mental ka defisiénsia Psiko-sosial ne’ebé semana kotuk ema ho defisiénsia Psiko-sosial hasoru, ne’ebé harahun fatin seguransa iha embaxada Japaun, harahun tan sidadaun ida nia kareta no inklui ema ho defisiénsia Psiko-sosial ida hetan taa hosi ema deskoñesidu, Asosiasaun Defisiénsia Timor-Leste (ADTL) hato’o, se governu la halo intervensaun seriu ba kazu hirak ne’e bele hamosu tan kazu foun, pior liu tan iha sidade Díli ho númeru moras mental kontinua aumenta ho kauzalidade oin-oin.
Liu hosi Konferénsia Imprensa, porta voz Nelson da Silva informa katak, hanesan ita akompaña direita no indireita liu hosi publikasaun media hahú inisiu fulan Janeiro 2024 ne’e mosu kazu oin-oin no problema saude mental iha kapital Dili.
“Iha loron 1 Janeiro 2024 akontese ema ho problema Psiko-sosial ida harahun vidru postu seguransa Embaxada Japaun nian, kontinua loron 7 Janeiru harahun tan sidadaun ida nia kareta iha Igreja Aimutin nia oin, inklui loron 10 Janeiru 2024 sidadaun ida ho naran Agostinho Soares tinan barak ona moris ho kondisaun problema saúde mental ka defisiensia Psiko-sosial hetan taa iha parte kakorok ho kanek grave hosi ema deskoñesidu. Ho kazu hirak ne’e diferente asaun komete hosi ema ho defisiénsia Psiko-sosial mak sai vitima (hetan violensia fiziku) hosi hahalok ema deskoñesidu.” Dehan Porta voz Nelson da Silva, iha edifísiu ADTL Quintal boot, tersa-feira, 16/01.
Nia dehan, relasiona ho situasaun refere sira observa katak, ema ho defisiensia Psiko-sosial barak mak abandona iha kapital Dili no la hetan atendimentu ba sira nia saude, numeru ema ho defisiénsia Psiko-sosial kontinua aumenta kada fulan ho kauzalidade oin-oin, fatin Acute Care iha Hospital Nasional Guido Valadares (HNGV), limitadu atu halo antedimentu ba ema ho problema saude mental. Laiha ekipa ida hosi Governu liu-liu Ministeriu Saude (MS) no Solidaridade Sosial hodi halo intervensaun imediata ba kazu hirak ne’ebé konsidera agresivu iha dalan.
Hosi ADTL rekomenda ba Governu liu-hosi Ministériu Saude no Ministeriu Solidaridade Sosial no Inkluzaun tenki kontinua haboot serbisu atendimentu emerjensia ba ema ho problema saude mental liu-hosi hamosu Acute Care iha postu saude hotu-hotu iha Dili laran (spasu ba atendimentu) tanba Acute Care iha ospital la sufisiénte, hodi kria fatin atendimentu ba ema ho problema saude mental hodi asegura tratamentu ho di’ak nune’e moos bainhira iha kazu agresivu presiza atendimentu ne’ebé imediatamente.
“Rekomenda ba publiku ema idak-idak tenki eduka rasik nia an labele halo trose, goza, stigma, baku no tuda ema ho defisiénsia psiko-sosial iha dalan ni-nin, tanba ho asaun ladiak no des-umanu sira ne’ebé ita halo ba sira ne’e mak rezulta fali ema ho problema saude mental hirus e agresivu liu tan hodi responde fali ho asaun violentu ba ita no ema seluk ne’ebé inosente.” Nia informa.
Nia Konklui, se governu la halo intervensaun seriu ba kazu hirak ne’e bele hamosu tan kazu foun no pior liu tan iha Kapital Dili tanba numeru moras mental kontinua aumenta ho kauzalidade oin-oin.
Tuir Sensus 2015 ema ho moras mental total na’in 3313.
