Reportajen Agustina Amaral
Porta voz professor kontratadu, Agustinho Pinto, iha konferénia imprensa relasiona ho desizaun Ministériu Edukasaun (ME) atu hapara profesores kontratatudu sira hatete, edukasaun hanesan setor estratéjiku no fundamental ne’ebé dezena no konstrui futuru Timor nian ba povu hotu-hotu ho seguru, prosperu no dignu, ho prinsíspiu ida ne’e, fó biban ba kualker governasaun hotu-hotu tenki aposta aan ho valor libertasaun nu’udar agenda politika Timor nian, maibé ita haree ba realidade desizaun politika IX governu, liu hosi Ministériu Edukasaun hapara professor no professora kontratadu, reklamantes no voluntáriu sira nu’udar desizaun ne’ebé injustu no dezumanu.
“Ami Konsellu nasional professores kontratu Timor-Leste, ami husu ba Ministra Edukasaun no Sekretáriu Estadu atu foti orientasaun bazeia ba Primeiru Ministru ne’ebe deklara katak la bele hapara porfessores kontratatu, IX governu liu husi Ministériu Edukasaun tenki konsidera,” dehan porta voz Agustinho Pinto ba jornalista sira iha Komunikadu Imprensa, iha Ponte Habibie, segunda 22/01.
Nia hatutan, reklamantes no voluntáriu kuaze 3000 i tal la aseita no la partisipa teste tanba antes ne’e sira hetan ona kontratu husi Ministeriu Edukasaun liu husi prosesu naruk ida no sira prienxe rekezitu barak ne’ebe Ministériu Edukasaun estabelese, tan ne’e sira nia lista publika iha Jornal da Repúblika nu’udar dokumentu ofisial estadu nian, nune’e ikus mai Ministériu Edukasaun rekoñese nu’udar profesor kontratadu.
“Programa ba teste bolsa de kandidatus ne’e, ami konsidera so vale ba hirak ne’ebe seidauk tama iha sistema kuadru pesoal Ministériu Edukasaun nian mak bele tuir teste, se Ministra Edukasaun la hatun karta notifikasaun legal por eskrita ruma mak ami sei hamutuk ho entidade hotu-hotu halo boikota ba programa Bolsa kandidatu husi Ministériu Edukasaun. Professores kontratatu 2022 no 2023 reziste nafatin hodi la tuir teste ne’ebe Ministériu Edukasaun sei fo sai.”
Sira husu ba kamada sosial hotu-hotu hamriik hodi solidariza luta ida ne’e, tan sira konsidera katak polítika Ministeriu Edukasaun IX Governu ne’e nu’udar forma ida ba obskurantiza sosiedade no hakle’an krize iha futuru.
Sira husu atu povu ki’ik no kiak sira hotu iha teritóriu nasional no maluk hirak ne’ebe vítima ba polítika IX Governu iha setor ne’ebé temi no seluk hodi hamutuk no la bele obedese ba injustisa ne’ebé buras da-daun iha rai doben Timor-Leste.
“IX Governu liu husi Ministra Edukasaun la promove pedagojia libertadora hodi halo avaliasaun dezempeñu ba profesores no hodi hapara sein karta notifikasaun ruma, IX Governu liu husi Ministra Edukasaun impede Professores Kontratadu 2022-2023. Husu ba Ministra Edukasaun no Sekretariu Estadu atu foti orientasaun bazeia ba Primeiru Ministru ne’ebe deklara katak la bele harapa Porfessores Kontratatu.”
Iha konferénsia imprensa ne’e sira konsidera Ministra Edukasaun viola lei nú.31/2023 iha artigu 38 kona ba avaliasaun dezenpeñu no dekretu lei nú.19/2011, 8 de Junho kona ba rejime avalisaun dezempeñu trabalhadores ba administrasaun públika.
Sira konsidera Ministra Edukasaun no Sekretáriu Estadu la halo polítika tuir orientasaun bazeia ba primeiru Ministru ne’ebe deklara katak la bele harapa Porfessores kontratatu, no konsidera polítika IX governu paradoksu tanba preve OGE 10.1% iha setor edukasaun maibé Ministra Edukasaun tenki hapara profesores lubun.”
“Desizaun polítika IX Governu liu husi Ministériu Edukasaun lori impaktu negativu ba estudante hotu-hotu liu-liu povu Ki’ik no Ki’ak nian oan sira iha territóriu nasional. Polítika ne’ebé dau-daun IX Governu produz ami konsidera nu’udar sosializa de’it krize sosial oi-oin iha sosiedade nia leet”.
