Home Notisia Ema Sosa Ikan Menus, Rendementu Tun

Ema Sosa Ikan Menus, Rendementu Tun

47
0
Faan ikan iha tasi ibun (foto: RTTL)

Reportajen Ruben ‘Hama’ & Mendes ‘Haksolok’

Situasaun ekonomia no politika ikus-ikus ne’e fo impaktu ba negosiador kik faan ikan iha tasi ibun Pantaikelapa nian. Sira nia rendementu tun tanba konsumedor mos ladun sosa sira nia ikan.

Tuir Sekretariu Komunidade Fa’an Ikan iha Pantaikelapa, Mendes Nogueira, haktuir katak, “agora dadun konsumidor sira nia presensa mai sosa ikan ne’e kuantidade ita haree tun, la hanesan tempu uluk ka tinan hirak liu  ba kotuk. Nia sente peokupa tebes ba situasaun agora dadun nee, tanba tuir nia haree kumunidade sira fa’an ikan dala ruma fa’an la hotu no balu estraga.”

Nia mos lamenta tanba maski sira iha situasaun defisil atu hetan ikan maibe negosiante Xinese kontinua hetan espasu no importa mos ikan hosi rai liur no nia husu atu governo tau prioridade ba Timor oan. Lia hirak ne’e Nogueira hato’o iha sira nia faan ikan fatin, horiseik (6/01).

“Iha parte seluk nia sente triste tebes, ba espasu ne’ebé ita nia governu relevante fó ba  Xineza sira. Tanba ne’e husu ba Governu relevante atu limita ba Xinesa ne’ebé impor ikan mai iha ita nia nasaun. Tuir lolos governu tau prioridade ba timoroan  sira, tantu peskador no vendedor oinsa bele kaer ikan ho kunatidade ne’ebé bo’ot  laos fó oportunidade ba nasaun seluk hodi hatama fali ikan mai iha ita nia nasaun”, Nogueira aumenta.

Membru komunidade faan ikan Adriano Jose, nia haktuir katak sente orgullu tebes tanba sira bele loron-loron hala’o atividade no sira hetan rendimentu husi atividade fa’an ikan iha Tasi-ibun Pantaikelapa. Maibé iha tinan rua tutuir malu sira fa’an ikan lá hanesan uluk, tanba ne’e nia sente triste tebes.

“Konsumudor sira lá hola ami nia ikan entaun ikan sira ne’e estraga hotu, tanba ami hola ikan barak, ema lá sosa entaun ami estraga deit ikan. Ami hakarak hato’o ba nai ulun sira fó liman ba malu oinsa bele serbisu hamutuk hodi promulga osan atu nune’e maluk konsumudor sira bele mai sosa ami nia ikan hanesan babain. Atu nune’e ami mós orgullu tanba ema mai sosan ikan barak ida ne’e mak ami mós hetan netik rendimentu”, dehan Adriano Jose.

Iha situasaun hanesan agora ne’e konsumedor mos sempre tetu kona ba sira nia konsumu. Bainhira sira sosa ikan lol-loron mak bele fo efeitu ba sira nia rendementu familia.

Konsumudor Rojito Viegas, bainhira hetan malu ho jornalista Neon Metin iha fatin faan ikan nian hateten katak  sira mós agora dadaun difisil tebes, tanba failansu ekonomiku husi tinan 2018 to’o mai to’o agora, entaun sira mós konsumu ikan naton, maske sira mós hakarak konsumu ikan loron-loron, maibé bazea ba sira nia salariu ne’ebé mak iha. Tanba iha tinan ida ne’e ikan nia pressu mós aumenta, failansu husi ami konsumudor tanba ami hetan salariu uitoan atu sustenta uma laran mak ami bele mai sosa, maibé ita hotu hatene katak ikan ne’e fó nutrisaun ba ita nia.

“Nudar povo sidadaun timor-leste ita hakarak buat ne’ebe diak ba ita nia nasaun, enkuantu iha krize pulitika ida ne’e, tanba deit diferensia ideas katak ita nia nai ulun sira bele tur hamutuk no bele hakotu impase pulitika ne’ebé mosu dadaun agora, I nu’udar juventude no povo babain ita hotu-hotu hakarak ita nia nasaun ne’e bele lao ho diak”, dehan Rojito Viegas.

Situasaun politika no ekonomia ikus ne’e halo komunidade fa’an ikan iha tasi ibun pantae kelapa sente triste tebes tanba ho situasaun ida agora kompara ho tinan kotuk la hanesan, tanba konsumudor sira la mai sosa sira nia ikan hanesan iha tinan 2017, tanba ne’e mak sira sente triste tebes. Maske sira fa’an ikan ho nia pressu $12 dolar, kompara ho tinan 2017 sira fa’an ikan ho nia pressu $15-18 dolar, dala-ruma sira fa’an ikan loron tomak dala ruma ema sosa deit butuk ida lae butuk rua deit hanesan ne’e, entaun ida ne’e difisil tebes ba sira atu kuida ikan ne’e, tanba ikan ne’e nia durasaun diak mak loron 1-3 deit se liu ida ne’e sira bele habai maran ka fa’an baratu deit ba maluk konsumidor sira ho nia pressu $ 2-3 dolar e dala ruma mos estraga se wainhira kosumudor sira sosa la hotu,  entaun ida ne’e mak fó impaktu ba sira nia rendimentu.

 

LEAVE A REPLY

Please enter your comment!
Please enter your name here