Home Notisia AJTL Preokupa Liberdade Imprensa no Espresaun Hetan Ameasa

AJTL Preokupa Liberdade Imprensa no Espresaun Hetan Ameasa

272
0

Reportajen: Mendes ‘Haksolok & Ruben ‘Hamas’

Impase polítika mak lao dadauk la’os afeta deit dezenvolvimentu ekonomíku pais nian maibe afeita dadaun Liberdade imprensa no Liberdade expresaun. Jornalista sira hahu hetan ameasa no partidarizasaun ba media estadu mos hahu akontese.

Tuir observasaun hosi Asosiasaun Jornalista Timor-Lorosa’e [AJTL] liu hosi konferensia imprensa, portavos AJTL, Acacio Pinto hateten katak politizasaun ba institusaun midia publiku nu’udar formar estratejia ida atu hodi intervene polítika redasaun RTTL E.P. no AjénsiaTatoli nian.

“Pesoál balu institusaun estadu no governu nian hahu ameasa no bandu Jornalista sira atu la bele espresa sira nia hanoin no pensamentu kona-ba asuntu sira ne’e realasiona ho interese públiku nian iha plataforma sira mídias sosial. Ameasa ne’ebé Xefe Gabinete, Sekretariu Estadu Kumunikasaun Sosiál [SEKOMS], halo hasoru Jornalista RTTL .E.P. Constancio Vieira, iha loron 11 Janeneiru 2019 nu’udar hahalok ditadura ne’ebé la afavor ba prinsipiu ba liberdade imprensa no liberdade espresaun iha nasaun demokrátiku ida-ne’e. Xefe Gabinete ne’e ameasa atu hasai jornalista ConstancioViera, husi nia knar nu’udar jornalista RTTL E.P”, hateten Acacio Pinto, 30/01.

Ho keixa ne’ebe hatoo hosi jornalista Constacio Vieira, AJTL kondena makaas aktu ka hahalok ameasa hosi Xefe Gabinte SEKOMS, Julio Gonçalves hasoru jornalista Constacio Vieira, tanba ne’e nudar hahalok arogante no ditadura ne’ebe la afavor ba valor demokrasi, liberdade imprensa no espresaun iha nasaun demokratiu Timor-Leste.

Ho situasaun ida ne’e AJTL ho nia pozisaun katak Xefe Governu, Primeiru Ministru Taur Matan Ruak atu hasai Xefe SEKOMS, Julio hosi nia kargu tanba nia attitude la apoiu dezenvolviment media no liberdade imprensa no liberdade iha Timor-Leste.

AJTL mos husu ba Konselho Imprensa [KI] nudar instituisaun estadu independente ida ne’ebe promove no defende liberdade imprensa no liberdade espresaun iha nasaun ne’e atu haree situasaun ne’ebe tanba liberdade imprensa no liberdade espresaun iha pais ne’e hahu ameasadu.

Liu hosi konferensia imprensa jornalista no nudar membru AJTL, Constancio esplika konaba lalaok akontesementu ne’ebe nia hasoru.

“Hau koalia no publika status iha sosial media iha loron 11/01. Iha status hau nen temi ema ida no la ameasa ema ida maibe hau espresa tuir saida mak hau sente, liu-liu iha hau nia status hau tau ‘tanba sa la kria politika aumenta emisaun sosa ekipamentu ne’ebe modern maibe kria politika hodi hasae ka ezenora ema  tan deit koor politika’ ida ne’e hau liberdade espresaun ne’ebe hau koalia. Ba situasaun ne’ebe akontese, iha loron ne’ebe hanesan iha oras tuku 12.00 Xefe Gabinete SEKOMS, Julio Goncalves telefone hau haruka hau atu ba hasoru nia katak nia atu fo eru ne’ebe mak Prezidente RTTL Naldo Rei halo ne’e hodi hatudu mai hau, maibe bainhira hau to iha gabinete nia hatete mai hau katak kuandu hau koalia bebeik sira nia problema ka desizaun governu nian, sekarik hau kritika nafatin sira, entaun sira sei hasai hau hosi RTTL. Ida ne’e limita hau nia liberdade espresaun ne’ebe mak preve iha KRDTL artigu 40. Hau sente preokupadu tanba hau nia liberdade espresaun ne’e hahu menus. Hau nia status hau la hatun ema nia privasidade maibe hau koalia konaba asumtu instituisional, no ba ida ne’e hau la tauk atu koalia, rende sei la rende, so tesi deit hau nia kakorok”, esplika Constancio ba jornalista sira.

Hatan ba perguntas hosi jornalista, konaba ho situasuan ne’ebe akontese karik agora moris iha situasaun ameasadu?

Constancio hatan katak Xefe Gabinete dehan atu hasai hau hosi RTTL ne’e signifika ameasa no limita atu labele koalia saida deit mak akontese, “ohin bele hasai hau hosi RTTL maibe hau la nonok atu koalia saida mak at no akontese iha RTTL”.

Jornalista Neon Metin mos koko halo konfirmasuan ho Xefe Gabinete SEKOMS Julio Gonçalves iha nia servisu fatin maibe Julio Gonsalves lakoi fo komenatrio ba kazu refere. “Hau lakoi fo komentariu relasiona ho kazu jornalista RTTL tanba razaun privadu”, hateten Julio.

*[Editor: Zevonia Vieira|NEON METIN |31.01.2019]

 

 

 

 

 

 

LEAVE A REPLY

Please enter your comment!
Please enter your name here