Home Notisia Papa Francisco Komfirmadu ona, Atu Vizita Timor-Leste Iha Tempu Badak

Papa Francisco Komfirmadu ona, Atu Vizita Timor-Leste Iha Tempu Badak

1125
0
Prezidente Ramos Horta hasoru malu ho Amu Papa Francisco iha Roma. [Foto: Media PR | 25.01.2024]

Reportajen David da Costa

Prezidente Repúblika José Ramos-Horta  hateten, Papa Francisco, Komfirmadu ona atu vizita Timor-Leste, no  markasaun ba  data ne’e, sei anúnsia ofisialmente hosi igreja katólika Timor-Leste hamutuk ho Santa Sé.

‘’Nia (Amu Papa) kontente ho Timor-Leste. Nia hadomi no akompaña situasaun no konfirma hakarak vizita Timor-Leste,’’ dehan Prezidente Ramos-Horta hafoin hala’o enkontru offisiál dahuluk ho PaPa Francisco, iha Basílica Santa Marta, sidade Vatikanu, Segunda 22/01,  ne’ebé maka Neon Metin asesu husi Media Palasiu Presidensial Bairo-Pite, Kinta 25/01.

Nia haktuir, Kona-bá Papa Francisco nia vizita ne’e, atu  halo markasaun ba data ne’e sei anúnsia ofisialmente hosi igreja katólika Timor hamutuk ho Santa Sé, maibé depende ba delegasaun hosi Vatikanu ne’ebé iha fulan rohan Janeiru ne’e, sei to’o iha Dili hodi estuda mekanízmu sira liu-liu estuda lozjstika no infrastutura ba vizita Sua Santidade nian.

Hafoin ko’alia kona-bá vizita RDTL, líder rai-rua ne’e diskute mós kona-bá situasaun mundiál inklui situasaun Myanmar: ‘’Haklean análiza situasaun ba Amu Papa ne’ebé preokupadu tebes liga ho umanitária no militár ne’ebé la konsege manan funu ne’e’’, afirma Prezidente Ramos-Horta.

Solusaun ba situasaun sira hotu, ne’ebé diskute iha diskusaun ne’e, mak mediasaun liuhosi negosiasaun atu labele hamosu tan guerra sivíl ida ne’ebé pior, hanesan mós iha Gaza no Ukránia. Ko’alia mós iha enkontru ne’e kestaun dívida mundiál ba nasaun sub-dezenvolvidu sira inklui problema kiak iha mundu.

‘’Amu Papa apresia mós kona-ba relasaun entre igreja ho Estadu ne’ebé la’o ho independente no la interfere malu, maibé kolabora institusionalmente nu’udár Timor-oan. Hanesan Xefe Estadu sempre orgullu lori Timor ba mundu maske rai ne’e ki’ik maibé mundu koñese no nasaun barak konsidera,’’ dehan Ramos-Horta.

Prezidente Horta haklean, Amu Papa sempre akompaña aten-brani povu Timor nia luta ba independénsia, hatene mós sakrífisiu sira hotu inklui admirasaun ba Timor-Leste nia rekonsilisaun ho Indonézia ne’ebé lais liu tambá konsidera hanesan rekonsilisaun úniku iha mundu maske iha funu-naruk nia laran.

Nune’e, Xefe Estadu esplika katak rekonsiliasaun ne’ebé akontese tanbá ‘’lideransa Kay Rala Xanana Gusmão, ne’ebé dada ba luta no dada ba rekonsilisaun.

Nune’e mós, Prezidente Republika husu ba povu tomak atu ‘’reza ba Amu Papa nia saúde’’, nune’e bele vizita Timor-Leste iha fulan-klaran tinan ne’e nian.

Remata enkontru ho Papa Francisco I, Prezidente Horta ho delegasaun kontinua enkontru ho Primeiru-Ministru Vaticano, Cardeál Pietro Parolin no Seretáriu Estadu Assuntu Relasaun Internasionál Vaticano, Archebispo Paul Richard Gallagher, hodi haklean diskusaun ba planu vizita Amu Papa nian iha tinan ne’e.

Iha vizita offisiál ne’e, Xefe Estadu akompaña hosi, Ministru Negósiu Estranjeiru, Bendito Freitas, Embaixadora Timor-Leste ba Santa Sé, Cheloé Tilman Dindo, Xefe Casa Civíl Prezidénsia Repúblika, Jesuína Maria Ferreira Gomes, Assesór Relasaun Internasionál Prezidénsia Repúblika, Nelson dos Santos no sira seluk tan.

Print Friendly, PDF & Email

LEAVE A REPLY

Please enter your comment!
Please enter your name here