Reportajen Filomena da Conceição
Prezidente Parlamentu Nasional, Fernanda Lay, hateten, relasiona ho programa Sekretario Estadu Asuntu Toponomia Organizasaun Urbana (SEATOU), ne’ebé kontinua sobu uma Komunidade okupa espasu Publiku, nu’udar representante povu iha uma fukun Parlamentu Nasional Sempre defende povu, maibé povu tenke ba fatin ne’ebé Permitindu hodi lábele disturba fatin publiku
“Hau defende povu maibé povu tenke ba fatin ne’ebé permitindu labele disturbu fatin publika, mas agora ita ba bazar to’o Farol sira ne’e hotu ” nao pode”, ita iha area sira ne’ebé labele, valeta nia leten labele, mota iha Bidau imi labele ba halo iha ne’ebá depois inundasaun ita hakilar governu”, dehan Fernanda Lay ba jornalista Sira banhira remata inkontru ho Presidente da Repúblika, iha Palácio Presidensial Bairo-Pite, kuarta 17/04.
Nia haktuir, tuir lei, 50 metros husi mota ninin, Komunidade labele halo uma, tanba ne’e, nu’udar representante povu iha PN, kontinua defende povu maibé, governu nia polítika mos defende ba povu ne’e duni, tanba bainhira iha area riskus iha dezastre naturais perde ona ema nia vida, tanba ne’e tenke husu autorizasaun bele ka lae halo iha ne’ebá.
“Ita bo’ot hatene ami hela iha tasi ibun, foer hotu ita soe ba mota, sintina nia septite, ba mota, ita labele nune’e, ha’u agredese Toponomia pelumenus iha aredores iha fatin balun, fahi teen la iis ona, ida ne’e pozitivu, tanba laloran la lori moras,”nia dehan.
Nia salienta, Agora Komunidade balun hakiak animal hotu iha sidade laran, no la hatene atu lori sidade ne’e ba ne’ebé, tanba ne’e iha situasaun balun ne’ebé mak favorável katak povu ki’ik buka moris iha fatin ne’ebé adekuadu.
“Klaru katak ita nia situasaun ekonomia dezenvolve Dili, iha kapital no iha fatin seluk lae, maibé, situasaun ne’e tenke neineik, primeiru ita tenke kria estabilidade politika iha rai laran, labele baku malu, no labele sabraut malu para Investimento mai”, Nia esplika
Nia konklui katak, labele moris ho funsionalismo publiku, ida ne’e mak problema boot, se investimentu la mai ne’e susar, tanba ne’e mai hotu iha instabilidade polítika iha pais, atu ema bele mai hala’o investimentu iha Timor atu bele hetan benefisiu husi ne’ebá.
