Reportajen Filomena Da Conceição & Agustinha Amaral
Reitor Universidade Nasional Timor Lorosa’e (UNTL), João Martins hateten, UNTL registu estudante akadémika hamutuk 51.258 no registu Estudante Inativu hamutuk 9255 hahú husi tinan 2000 to’o 2012 nune’e estudante refere sei lakon nia direitu bainhira la halo konfirmasaun to’o loron 31 fulan outubru 2024.
“Tuir los ami halo 2000 to 2024 maibé ami fahe ba etapa ida primeiro ne’e ami halo uluk ano 2000 to’o 2012, neste momentu estudante 9255 mak kategoria inativu estudante ne’ebe rezistu iha UNTL sira la ativamentu asesu ba apredizajen UNTL”, dehan Reitor UNTL ba Jornalista sira iha edifisiu UNTL Central, kuarta, 24/04.
Nia esplika, hakarak fo sai ba públiku konaba regulasaun narativu UNTL nian, tuir dadus ne’ebé mak iha akademika UNTL nian 51.258 mak rezistu iha sistema, estudante sira ne’ebe mak la aktivu momentu ne’e hamutuk 25.021 pesoal, iha biban ida ami hakarak fokus ba estudante ne’ebe mak la aktivu desde anu 2000 to’o 2012.
“Tinan barak nia laran sira la mai, iha tinan kotuk ami fo ona 18 mezes sira atu mai bele halo regularizasaun maibé infelizmente pur volta 400 i tal mak mai deste momentu, ita sei hela 9255 mak la mai, hanoin katak sei fo nafatin biban ba sira, ne’ebé Universidade Nasional Timor Lorosa’e liu husi enkontru konsellu jestaun UNTL nomos reitor konsellu jeral iha semana kotuk, ami tenki hamutuk hodi husu ba estudante inativu anu 2000 to’o 2012”, Nia Esplika.
Entre tantu, nia enkoraja estudantes 9255 atu bele fila hikas ba UNTL apartir anúnsia husi aban (25/04) to’o dia 31 outubro 2024, nune’e ba estudante sira ne’ebé la marka prezensa no la halo reklamasaun ba situasaun iha UNTL entaun otomatikamente, signifika sira lakon sira nia direitu tomak iha UNTL
“Ami halo apelu ba estudante UNTL husi periodu 2000 to’o 2012 hamutuk 9255, komesa aban bele hakat mai UNTL para reatualizasaun ita boot sira nia situasaun atu nune’e bele planea ita boot sira nia prosesu estudu bele akompaña ita sira to’o gradusaun.”
