Reportajen David da Costa
Prezidente Repúblika (PR) José Ramos-Horta, dehan, traballadór sai nu’udar kabas ba ekonomia no dezenvolvimentu Timor-Leste, tanba liu husi traballadór sira nia servisu maka’as no esforsu loroloron nian, maka nasaun sei la’o ba oin.
Loron 1 fulan-Maiu mak data signifikante ida bainhira fó onra no selebra kontribuisaun husi traballadór sira iha mundu tomak. Loron Internasionál Traballadór nian hanesan oportunidade ida ba traballadór sira iha nivel globál atu hamutuk iha solidariedade, hodi halibur hamutuk hodi selebra rezultadu servisu no rekoñese progresu ne’ebé iha hodi hadi’a kondisaun servisu nian.
“Iha Loron Internasionál Traballadór nian, ita hateke ba oin ho orgullu ba progresu ne’ebé ita hetan ona ba traballadór sira iha Timor-Leste. Ami rekoñese esforsu boot husi traballadór hotu-hotu ne’ebé kontribui ba dezenvolvimentu ekonómiku no sosiál iha ita-nia nasaun joven ida ne’e,” Prezidente Repúblika José Ramos-Horta hateten iha komunikadu imprensa ne’ebé Neon Metin asesu husi Palásiu Prezidensiál Bairo-Pite, Tersa 30/04.
Nia haktuir, maibé, sei iha servisu atu halo, tenki garante katak traballadór hotu-hotu iha empregu ne’ebé seguru, kondisaun dignu no iha kapasidade atu sustenta sira-nia família ho adekuadu. No tenki kontinua defende direitu traballadór sira-nian no asegura oportunidade ne’ebé hanesan ba hotu-hotu ka ema hotu.
“Ohin loron, ita selebra serbisu maka’as, dedikasaun no sakrifísiu sira husi traballadór sira iha ita-nia nasaun. Ita-boot sira sai nu’udar kabas ba ekonomia no dezenvolvimentu Timor-Leste nian. Liu husi ita-nia servisu maka’as no esforsu loroloron nian, ita-nia nasaun sei la’o ba oin,” dehan Ramos-Horta.
Tanba ne’e, Unidu iha esforsu sira, atu bele harii Timor-Leste ida-ne’ebé forte liu, prósperu liu, no ida-ne’ebé ekuitativu liu ba traballadór hotu-hotu no sira-nia família.
“Ha’u desezu ba traballadór sira hotu kontenteksolok ba selebrasaun Loron Traballadór nian, nakonu ho pás no ksolok, no hein katak tinan oin mai sei lori prosperidade no progresu barak liután mai ita,”Xefe Estadu hato’o desezu ba Traballadór sira hotu.
