Reportajen Juvinal Cabral
Diretór Ezekutivu Fundasaun Mahein (FM), Nelson Belo hateten liu hosi konferensia imprensa militarizasaun servisu nasional intelijénsia utiliza armas hakanek mane ida ho kondisaun grave iha Tilomar Kovalima , nune’e mos halo agresaun fízika hasoru ema ho defisiénsia ida hetan tohar
Iha konferensia imprensa Diretór haktuir kronolojia akontesimentu iha loron 1 Maio 2024 kalan tuku 10:20, membru FALINTIL -Forsa de Defeza de Timor-Leste (F-FDTL) ida ne’ebé destaka iha Servico Nacional de Intelijénsia (SNI) ho armas tiru kanek mane ida iha aldeia Wetaba, suku Beiseuk, postu administrativu Tilomar, munisípiu Kovalima
“Tuir kronolojia akontesimentu ne’ebé Fundasaun Mahein (FM) rekolla iha loron 1 Maio 2024 kalan tuku 10:20 komunidade sira ne’ebé tuir hela reza kalan nian no sei tur hela iha estrada hemu tua, haree kareta ida ho tipu Hilux kor metan la iha sapa matrikula tula feto ida ho diresaun atu ba salele” Nelson Belo haktuir liuhosi komferensia imprensa 3/05/2024, iha edifisiu Fundasaun Mahein
Nia hatutan komunidade balun telefone tuir kedas feto ne’ebe tula iha kareta ne’e derepenti mane ne’e fila kareta no husu tuir ba joven sira ne’ebé tur hela iha estrada no joven sira tenta atu foti ka hadau feto ne’ebe tula iha kareta, husi ne’e kedas mane ne’ebé lori kareta refere tiru hasoru kedas joven sira ne’ebé tur iha estrada no tiru kona joven mane ida nia kotuk laran no borus ba kabas, nune’e mos halo agresaun fizika hasoru ema ho defisiensia ida hetan tohar
“Akontesimentu ne’e komunidade serku tiha mane ne’e no identifika katak mane ne’e GSC, Postu Subtenente nu’udar membru F-FDTL ne’ebé destaka iha SNI no servisu iha postu fronteira munisipiu Kovalima” dehan Direktur Ezekutivu Fundasaun Mahein
Nelson Belo hateten vitima joven mane nia naran inisial EC ho idade 24 anos, hela iha aldeia Wetaba suku Beiseuk postu administrativu Tilomar munisipiu Kovalima, hosi akontesimentu ne’e vitima hetan kanek grave no lori kedas ba hospital Suai hodi hetan tratamentu no transporta ona ba Hospital Nacional Guido Valadares (HNGV) hodi kontinua halo tratamentu tanba kanek
“Hosi akontesimentu ne’e Fundasaun Mahein hakarak partilla observasaun sira ligadu ho servisu inteligensia nian ka SNI nia lalaok kona ba politika lideransa no jestaun organizasional no utilizasaun armas de fogo iha SNI”
Fundasaun Mahein (FM) rekomenda ba Komandu F-FDTL no servisu investigasaun aselera prosesu investigasaun ba kazu membru F-FDTL ida ne’ebé destaka iha SNI no koloka iha Postu fronteira terestre munisipiu Kovalima ne’ebé tiru joven Ida iha Tilomar ho seriu, transparensia ho akontabilidade, nune’e mos sira rekomenda ba Provedoria Direitos Humanos no Justica (PDHJ) tau matan ba kazu membru F-FDTL ne’ebé tiru joven Ida iha Tilomar hodi asegura katak prosesu ne’e lao ho transparante no akontabilidade nomos garantia direitos Humanos sidadaun sira nian hanesan vitima hosi autoridade seguransa nia asaun
