Reportajen Silvino Freitas
Fundasaun Média Development Center (FMDC), UN Women, Sekretaria Estadu ba Igualidade (SEI) no Sekretáriu Estadu Komunikasaun Sosial (SEKOMS) entrega rekursu Reportajen Sensivel ba Jéneru ba Konsellu Imprensa (KI) Timor Leste, nune’e produtu koñesimentu hirak ne’e, bele tulun pessoal média sira iha relatóriu no monitorizasaun sensivel ba jéneru.
Reprezentante UN Women Amy Nishtha dehan, UN Women iha komprimisu atu promove igualidade jéneru no empodera feto, nune’e manual reportajen sensivel ba jéneru no livrinu husi matadalan oferese orientasaun pratika iha reportajen kona-ba violénsiabazeia ba jéneru ho justu, imparsialidade, no respeita integridade sobrevivente sira nian.
“Importánsia atu aumenta lian sobrevivente sira nian harahun silensia ne’ebé haleu violénsia bazeia ba jéneru no promove kultúra responsabilidade, ha’u enkoraja orgaun komunikasaun sosiál hotu atu uza livru ne’e no integra prinsípiu sira iha sira nia pratika reportajen sira” dehan Reprezentante UN Women Amy iha salaun FMDC Hudi-Laran, (25/07).
Fatin hanesan Prezidente KI Otelio Ote dehan, KI hanesan orgaun reguladora ba meiu komunikasaun sosial sira hotu simu manual ne’e ho kontente tanba manual ne’e KI mak sei jere nia sustentabilidade, nune’e KI agradese tebes ba manual ne’e tanba nafatin iha konsistensia ba kobertura asuntu jéneru tanba asuntu bazeia ba jéneru ne’e asuntu issue global tanba ne’e média sira iha Timor Leste tenke tau papél importante ba asuntu ida ne’e.
“Ita boot sira haree iha tinan hirak liu ba ita mai ho teoria de’it ita alerta de’it maibé laiha asaun pratika ida, uluk iha rekursu ne’ebé mai husi nivel sekundária maibé ba dadaun ne’e hahú ona dezenvolve rekursu iha UNTL no UNITAL no UCT mós dadaun ne’e dezenvolve ona rekursu iha area komunikasaun sosial nian” dehan Prezidente KI Otelio Ote.
SEI Elvina Souza mós akresenta, SEI, SEKOMS no KI nafatin servisu hamutuk atu halo atividade ne’ebé kontribui reportajen ne’ebé sensivel ba jéneru ho produtu média sira nian ne’ebé hala’o sira nia servisu kobertura atu kontribui halo mudánsa ba mentalidade ho patriakal liu iha sosiedade, nune’e SEI haree katak média iha papél ne’ebé importante ba iha mudánsa mentalidade ne’ebé koruptu, diskriminativu.
“Ho konsiderasaun ba média poder boot no iha papél importante ba mudánsa entaun SEI, SEKOMS no KI nafatin iha kolaborasaun hodi kontribui ba produtu jornalistaku sira ne’ebé sensivel ba jéneru, programa ne’e akontese tanba ita iha servisu kooperasaun ho UN Women ho programa ida naran Hamutuk ba Igualidade” dehan SEI Elvina.
Nia dehan tan, programa sira hanesan la’ós to’o iha ne’e de’it maibé sei buka tan programa seluk atu empodera no hasa’e konesimentu média sira nian atu bele hala’o kobertura sensibel ba jeneru atu bele kontribui di’ak liu tan ba mudánsa mentalidade nian, nune’e mós programa ida ne’e koresponde ba iha planu asaun nasionál violénsia bazeia ba jéneru iha pillar prevensaun ne’ebé foka liu ba mudánsa mentalidade atu kontribui ba sosiedade ne’ebé igual liu.
