Reportajen Umbelina dos Reis
Asosiasaun Defisiénsia Timor-Leste (ADTL), realiza enkontru anual ho organizasaun membru ba dala-12 hodi refleta progresu dezafiu no lisaun aprende, nune’e identifika asaun konjunta ba inkluzaun defisiénsia iha Timor-Leste.
Diretor Ezekutivu Asosiasaun Defisiénsia Timor-Leste (ADTL), Cesario da Silva hateten, kada tinan iha fulan dezembru, ADTL sempre enkontru anual ho membru organizasaun nune’e tuur hamutuk hodi ko’alia konaba objetivu ne’ebé atinji ona, dezafiu saida mak sira enfrenta no buat barak mak ita asosiasaun aprende hamutuk ona.
“Agradese tebes ba parte hotu nia dedikasaun ba ema ho defisiénsia, tanba ADTL nia membru iha tinan ida ne’e membru hamutuk rua nulu resin ualu (28), planu estratéjia define ona nune’e sai hanesan sentru rekursu ba ita nune’e enkoraja nafatin ba membru sira katak dezafiu hira ne’e mak sai hanesan oportunidade ba ita, nune’e orsida ita halo diskusaun espesial para foti programa ida ne’ebé mak ita sei realiza iha tinan tuir mai.” Dehan Diretor ezekutivu ADTL liuhosi nia diskursu iha salaun ADTL, Mascarinhas.
Manager Gender Equality Disability and Social Inclusion (GEDSI), Carmeneza Monteiro hateten, servisu ba igualdade jeneru no inkluzaun ba ema ho defisiénsia no social ne’e lafasil maibé la imposivel liu-liu iha kultura patriarkal, iha nasaun ne’ebé kuaze metade moris iha liña kiak nia okos no rekursu ne’ebé limitadu tebe-tebes.
“Tinan ida ne’e ha’u foti papel nu’udar lider teknika espesifikamente ba igualdade jéneru no inkluzaun ema ho defisiensia, la’os primeira ves servisu iha área ida ne’e, tanba ha’u nia misaun no kompromisu pesoal mak área ida ne’e duni no sempre haree no hala’o servisu papel igualdade jéneru no inkluzaun ema ho defisiensia no social nian, maibé diferente oi-toan tanba dezafius no oportunidade apredijazen ne’ebé la hanesan. Mai ha’u tinan ida ne’e espesial tebes no nakonu ho ksolok tanba ita-boot sira, liafuan Afrika nian dehan ‘abutu’ katak ha’u existe tanba ita-boot sira”. Dehan Manager Carmeneza Monteiro, liuhosi nia diskursu iha salaun ADTL Mascarinhas, sexta-feira, 20/12.
Nia informa, DFAT husu ha’u atu partilha katak da-dauk ne’e Governo Australia lansa ona estratejia dezenvolvimentu ba direitu ba ema ho defisiénsia, ne’e hanesan estratejia ida ne’ebé sai mata dalan ba Dezenvolvimentu internasionalmente. Alende ne’e Australia mos lansa ona Planu parseria dezenvolvimentu ho Governo Timor-Leste ba 2025-2030.
“Permite partilla informasaun sumáriu kona-ba dokumentu rua ne’e sai hanesan baze ba resposibilidade husi Governo Australia nia kompromisu. Estratejia dezenvolvimentu ba direitu ba ema ho defisiénsia hatur vizaun, prinsipiu, prioridade no aprosimasaun ba lalaok dezenvolvimentu internasional ba oin nian.” Nia dehan.
