Reportajen David Costa
Embaixadór Republika Argentina mai iha Timor-Leste, Rezidensia iha Jakarta Indonesia sei halo promosaun ba kafé Timor-Leste iha nasaun Argentina, tanba kafé Timor-Leste diak tebes, ho ida ne’e nia lori kafé Timor-Leste saku ida ba iha Argentina hodi fahe ba nia kolega sira.
Embaixadór Republika Argentina mai iha Timor-Leste Rezidensia iha Jakarta Indonesia Gustavo Rivardo Coppa, hatete, nia gosta kafé Timor-Leste, bainhira nia To’o iha Dili, iha Aeroportu internasionál Nicolao Lobato Dili, Portokolu sira oferese kafé Timor-Leste ne’ebe maka diak tebes.
“Ha’u gosta kafé, ita-boot hatene? Bainhira ha’u to’o iha Dili horseik iha aeroportu, Portokolu oferese kafé ida mai ha’u no ha’u labele hemu de’it kopu ida, kafé kopu rua, tanba kafé ne’e di’ak tebes. No iha ne’e kafé ne’ebé prezidente oferese mós di’ak tebes. Ha’u gosta kafé ne’ebé laiha masi-midar, tanba nia furak tebes ne’ebé ha’u la presiza aumenta masi-midar, ha’u hemu kafé Timor-Leste di’ak tebes,” dehan Embaixadór Republika Argentina mai iha Timor-Leste, Rezidensia iha Jakarta Indonesia Gustavo Rivardo Coppa, bainhira remata enkontru ho Prezidente Repúblika José Ramos-Horta, iha Palásiu Prezidensiál Bairu-Pite, Tersa 18/02.
Embaixadora ne’e dehan tan, nia lori kafe Timor-Leste saku ida ba nia uma atu fahe ba nia kolega sira no mos halo promosaun ba kafé Timor-Leste iha nasaun Argentina. Eestaun kafé ne’e mós ohin komvensa ona prezidente Republika Tanba sidadaun Argentina sira gosta loos hemu kafé.
“konserteja ha’u lori kafé saku ida hanesan ne’e ba ha’u-nia uma atu hemu no fahe ba kolega no mós halo promosaun ba kafé Timor-Leste. Tanba ema Argentina ita-boot hatene katak ema Argentina gosta liu kafé,” Dehan Gustavo.
Alende ne’e mos nia ko’alia, vizita ida ne’e hanesan vizita daruak no hanesan onra ida ba nia atu ko’alia kona-ba kestaun polítika bilaterál entre nasaun Argentina nian nune’e nia kontente tebes kona-ba amizade, entre povu Timor-Leste, alende ko’alia mos kona-ba vizita Papa Francisco nian.
“Ida ne’e hau nia vizita daruak no hanesan onra ida ba ha’u, no ko’alia kona-ba kestaun polítika bilaterál entre nasaun rua nian, ha’u hateten ba Prezidente Repúblika katak ha’u kontente tebes kona-ba amizade, entre ita nia povu sira, no ko’alia mos kona-ba vizita Papa Francisco nian,”Nia dehan.
Embaxadór esplika tan, iha diskusaun sira ne’e, sei lori ba Argentina hodi diskute kle’an ho Governu Argentina atu bele hametin relasaun bilaterál entre nasaun rua nian iha area edukasaun nian. Tanba Argentina iha planu atu koopera ho Governu iha setor edukasaun liuliu iha ensinu superior iha área espesializadu sira.
“Edukasaun ne’e liliu ba ensinu superiór sira iha área ensinu espesializadu sira, Ezemplu dezenvolvimentu agríkola, turizmu, nune’e Argentina iha poténsia ne’e hotu atu oferese ba nasaun hotu-hotu. Argentina mós iha poténsia barak atu oferese kooperasaun iha formasaun ba profesór sira, maske iha diferensa lingua. Ha’u hanoin, ita bele koopera hamutuk iha área sira ne’e,” Nia esplika liu tan.
Prezidente Repúblika (PR), Jose Ramos-Horta Horta, hateten, pesoalmente koñese Argentina, koñese lider sira diplomata lubuk ida, tinan hirak nia laran, sira hakarak haree no estuda oinsá bele aumenta relasaun birateral, maibé hateten ba embaixadó tenke realista, tanba Argentina ho Timor-Leste dook tebe-tebes, atu halo komérsiu ka relasaun komersiál importasaun no esportasaun, susar los, tanba dook los.
“Argentina la’ós produz kafé, maibé sira hemu kafé hanesan ema sira iha Europa ne’e, Italia, maibé ita nia kafé ne’e la sufisiente fan ba rai barak hakarak sosa, ita nia kafé ne’e la iha problema fan, ema hotu-hotu hakarak sosa, maibé kuantidade ne’e ladún barak,” dehan Ramos-Horta.
Nia dehan tan, maibé, ba ohin sei haree took kooperasaun ruma, Argentina bele apoiu Timor-Leste iha parte ruma hanesan fó bolsa estudu ba Timoroan ba estuda iha Argentina, tanba ne’e sei foka ba iha ida ne’e.
