Reportajen Juvinal Cabral
Faculdade Ciencia Sosiais (FCS), Universidade Nasional Timor Lorosa’e (UNTL) realiza reflesaun nasional kona ba 50 anos aniversario proklamasaun indepedensia de Timor-Leste, atu hatene lider istoriku nia papel importante iha luta indepedensia para atu haree valor saida, mensagen saida mak sira atu rai hela ba jerasaun foun.
Eis-Primeiro Ministro Taur Matan Ruak iha nia palestra Faculdade Ciencia Sosiais (FCS), Universidade Nasional Timor Lorosa’e (UNTL) parabeniza no enkoraza universitariu sira estuda makaas liu tan, maibe nia husu mos estudante sira tenke halo liu buat ne’ebe sira halo maske sirkuntansia la hanesan no dezafiu la hanesan.
“Ha’u nia oan sira ha’u sempre ba fati-fatin ha’u lansa ba joven sira estuda mate no dukur iha livru nia leten estuda la iha fronteira,”dehan Eis-Primeiro Ministro Taur Matan Ruak iha UNTL-FCS, Caicoli 14/05.
Dalabarak ema dehan idade estuda liu ona, maibe lae estuda no atualiza nafatin matenek ne’ebe iha.
“Ha’u hakarak agradese ba reitor ho ekipa tomak bele konvida ha’u mai palestra kikoan ida ne’e hodi halo reflesaun kona ba 50 anos Timor nian deklarasaun vilateral indepedensia to’o agora”
Eis-Primeiru Ministru parabeniza populasaun tomak iha Timor ba 20 de Maio, “tinan-tinan ita selebra ita buka hafoun an beibeik infrenta dezafiu sira ne’ebe iha ita nia oin.”
“Dezafiu la’os individual de’it no familiar mais dezafiu nasaun nian porque ita hotu-hotu buka servisu hamutuk halo dezenvolve ita nia rai di’ak liu, tanba ne’e parabens ba ita nia povu Timor tomak.”
Esperansa Eis-Primeiru Ministru hateten hotu-hotu sai jogador di’ak mak sira ne’ebe buka bola labele hein bola de’it.
“La husu ba Timor saida mak bele fo ba ita, mais ita husu ba ita nia an saida mak ita bele fo ba Timor, to’o kada ida-idak tuir nia kbiit no nia posibilidade kontribui ho masimu ba ita nia rai,” dehan Taur Matan Ruak
“Tinan ida ne’e 2025 ita proklama selebrasaun aniversario proklamasaun unilateral ne’ebe mak halo iha 28 de Novembro 1975 ba dala 50 anos aniversario,” dehan reitor UNTL Joao Soares Martins iha FCS Caicoli.
Reitor UNTL hatutan universidade iha inisiativa rasik konvida lider istoriku sira ne’ebe mak autor ba momentu proklamasaun, nomos sira ne’ebe mak konduz luta husi kedas 1975 mai to’o faze rezistensia to’o lori ba referendu 30 de Agostu 1999 entaun tenta atu kapta sira nia hanoin, sira nia pensamentu, sira nia vizaun ba Timor-Leste saida mak valor proklamasaun ne’e sustenta ba luta libertasaun ne’e husi faze batalla frente a frente ho tropa Indonezia nia.
“Durante guerilla mai to’o ita referendu valor proklamasaun ninia kontextualizasaun iha era indepedensia dezenvolvimentu nian saida mak lider sira atu hare para jerasaun foun sira kontinua ne’e mak ideia prinsipal no ami halo ona autor xave sira hanesan ita nia Primeiro Ministro Maun boot Kayrala Xanana Gusmao ho Eis-Primeiro Ministro Doutor Mari Alkatiri ita nia Prezidente atual Doutor Jose Ramos Horta agora ho maun Taur Matan Ruak Eis-Prezidente no mos sei konvida tan sira seluk,” tenik reitor UNTL iha FCS Caicoli.
Reitor dehan sira ne’ebe mak papel importante iha luta indepedensia para atu haree valor saida, mensagen saida mak sira atu rai hela ba jerasaun foun.
