Reportajen Crecensia de Castro
Finder Energy nu’udar kompania minerais ne’ebe hetan konfiansa husi estadu, dadaun ne’e ninia komitmentu ba konteudu lokal atu fo bolseiru ba Universitariu sira, no foka liu ba feto sira nebe foti kursu exata, Siensia Teknolojia Matematika ka enjenaria iha Universidade rua, hanesan ne’e Universidade Timor Lorosae no Universidade Dili, atu fo bolseiru ba tinan 2025 nian no sei halao estudu iha rai laran.
CEO Finder Damon Neaves hateten objetivu husi sorumutu ida ne’e atu asina akordu entre Universidade rua, Unital Universidade Timor Lorosae no Undil Universidade Dili ho Compania Finder Energy ba programa bolsu estudu tinan 2025 nian.
“Benefisiu ne’ebe estudante sira sei hetan mak kompania sei selu sira nia propinas eskola nian ba tinan ida i nomos fulan-fulan sira sei heta osan transporte nian atu bele sustenta ba sira nia atividade eskola nian” dehan Nia
Nia mos hateten tan katak kriteria ba bolsu refere maka eskola duni iha Universidade rua ne’e, tenke sidadaun Timor no ninia valor ba semestre ikus tenke ho ipk 2,77 ba leten no tenke hatudu duni katak sira presija duni apoiu asistensia ba finanseiru no la hetan bolsu estudu iha fatin seluk no tenke feto.
Nia dehan akordu entre Universidade rua ne hanesan pasu primeiro i tuir mai sei kopera ho Universidade rua ne’e para bele halo selesaun depois maka kandidatu sira nee mai iha kompania hodi halo gestaun finansas.
Iha fatin hanesan Dekanu Fakuldade Enjenaria UNDIL Januario Bernardo hateten atividade ohin loron nian hanesan asina moiu entre UNITAL no UNDIL ho Finder Energy, komapania refere hanesan kompania ne’ebe servisu iha area minereais ne’ebe hetan konfiansa husi governu e agora dadaun sira fornese mos bolsu estudu ba Timoroan iha UNITAL no UNDIL liu-liu ba alin feto sira.
“Sira nia objetivu hakarak hasae tan konesimentu ita nia alin feto sira ne’e atu fo motivasaun ba sira tamba hanesan ita haree katak area enjenaria ne’e feto menus teb-tebes ho ida ne’e bele motiva alin feto sira atu aprende iha area enjenaria espesifiku liu iha area minerais” dehan Nia
Nia mos hateten tan katak tuir MOU ne’e kada Universidade sei reprezenta estudante feto nain haat ne’ebe mak sei semestre inisiu 1 to 3 no bolsu estudu ne’e ba durasaun tinan ida nian, depois de ida ne’e sei halo seminariu husi UNDIL no UNITAL atu nune’e bolsu estudu ne’e sei kontinua ba oin.
Nia hakotu katak razaun foka liu ba estudante feto sira tamba partisipasaun estudante feto sira iha area refere menu ho ida ne’e bele enkoraja feto sira katak feto mos bele foti departamentu iha area refere.
Iha sorin seluk Vice Reitor Asuntu administrasaun Finansas UNITAL Silualve da Costa Belo hateten ohin Universidade rua mai hamutuk iha UNDIL nia fatin ho parseiru sira Finder Energy asina akordu ida iha area enjenaria liu-liu iha geolojia, kimika, matematika atu oferese bolsu estudu ba estudante sira.
“Kada Universidade ema nain haat maibe prioridade liu ba feto katak ne oportunidade ida ne’ebe mak diak tebes para atu eleva konesimentu feto sira nian iha are enjenaria” dehan Nia
Nia hatutan tan katak parte UNITAL nia preparadu ona kandidatu hamutuk nain ualu para halo selesaun no espera katak ba oin sei servisu hamutuk diak liu tan.
