Reportajen Umbelina dos Reis
Komunidade eis Aspol fo tempu loron tolu ba governu tun diretamente, hodi halo klarifikasaun ba sira nia direitu no dever, nu’udar negosiante no povu Timor oan ba durante fulan ida ona sira sente nonu governu konstituisional halo eviksaun hasoru sira doku ona sira nia ahi-matan no halakon labarik, joven foinsa’e sira nia ne’ebé hela iha bairo Aspol ne’e nia futuru.
Portavoz Teresa Jacinta Fatima Soares liuhosi konferensia imprensa hateten, Repúblika Demokrátika Timor-Leste estadu ida neʼebé demokratiku, soberanu ukun rasik an harii hosi povu nia hakarak no respeitu ba diginidade ema moris ida-idak nian ne’ebé hatur ona iha KRDTL Artigu 1, numeru 1. Nune’e mak ami komunidade eis Aspol mai buka moris iha fatin ne’e, maibe iha parte seluk presiza ita hotu nia kontribuisaun atu halo dezenvolvimentu nasional.
” Tanba ne’e mak komunidade eis Aspol durante ne’e kolabora 100% no kumpri desizaun ka orden governu RDTL liu husi Sekertariu Estadu Assuntu Toponomia e Organizasaun Urbana nian, i konsege hamamuk fatin ho voluntariamente durante loron haat nia laran hahu husi loron 17-20 kopera hamutuk ho Sekertaria Estadu Assuntu Toponomia e Organizasaun Urbana. Depois ami hamamuk tiha fatin ida ne’e Laiha parte kompetente liu-liu Ministreiriu Justisa (MJ), Sekertariu Estadu Terras Propriedade (TERAS) , Ministeriu Administrasaun Estatal (MAE), Ministeriu Obras Publika, Propriedade (MOP), no autoridade Lokal sira iha Parte Areia ida nee too oin loron laiha ema ida ka reperzentante ida mai esklarese ba ami Komunidade nia direitu.” Dehan portavoz Teresa Jacinta Fatima, liuhosi konferensia imprensa, iha Villa verde, Tersa-feira, 12/08.
Nune’e iha momentu ne’eba komunidade kumpri no obedese ba estadu RDTL hodi hamamuk fatin ne’e, maibé antes ne’e husi parte kompetente mai foti dadus no halo ona markasaun ba ami nia uma dala rua no promete katak tempu badak ekipa SEATOU mai hamutuk ho sira hodi realiza dialogu. Depois fatin nee ita nia estadu atu uza ba komum maibe realidade la realiaza.
“Ami hakarak konfirma fila fali prosesu dadus, markasaun ne’ebe antes ekipa Ministeriu justisa, liu husi Teras propriedade, no Ministeriu Obras Publika rekualia no markasaun tiha ona antes ne’e too iha ne’ebé ona no oinsá ona, Tanba ami komunidade eis Aspol afetadu eviksaun ne’e maioria vida negosiante no estudante infantil too universitariu.” Nia dehan.
“Ami komunidade eis Aspol vila verde fo tempu loron tolu ba governu atu tun diretamente mai atu fo klarifikasaun no esplikasaun mai ami nia direito no dever ho lo-los, karik governu seidauk iha planu ruma ba fatin refere mak ami komunidade eis Aspol sei reativa fila fali ami nia atividade negosiu iha fatin ida ne’e, tanba razaun durante fulan ida ona ami nia ahi matan taka hodi hasusar tebes ami nia oan sira nia futuru.” Nia informa.
Nia konklui, hato’o ba estadu RDTL katak orsamentu ne’ebe komunidade balun simu ne’e rekopera husi krize tinan 2006 nia konaba indeminizasaun ba krize 2006 nian, laos komunidade eis Aspol mesak maka Simu maibé sidadaun sira ne’ebe mak altura ne’eba sai vitima ba krize refere kuaze simu hotu.
Iha fatin hanesan António Gusmão Soares hateten, Governu hateten dehan labarik ki’ik labele faan sasan iha dalan ni-nin tanba lei bandu, maibé momentu neeba ekipa relevante sira tun diretamente halo markasaun numeru ba uma refere, no dehan sei halo dialogu ho komunidade. Maibé realidade dialogu laiha haruka ami hamamuk fatin deit.
” Momentu sira tun direita mai sobu uma refere ne’e Labarik Pre-primaria sei ezame segundu periodu nian, maibé akontese hanesan ne’e entaun labarik sira la tuir ezame too ohin loron tanba laiha fatin sira atu hela hodi ba eskola. Governu kria hahalok ne’e kontra rasik sira nia lei no viola labarik sira nia direitu ka lae? Governu hakarak povu nia oan kontinua la eskola, sira ida boot nia oan mak kontinua eskola no matenek no kontinua ukun.” Nia husu.
Nia dehan, Governu ukun povu ne’e ukun ho lo-loos tanba Timor ukun rasik an ne’e sosa ruin no ran no ita hotu nia luta, la’os imi nain ulun sora nia luta mesak, nune’e ukun povu tenki transparensia. Tanba governu duni sai hotu povu bain-bain iha sidade laran, no simu fali estranjeiru china nakonu sidade ne’e oinsá governu nia hare ? se ami komunidade Aspol ne’e la’os Timor bele entrega ami ba nasaun seluk.
“Ami sente Triste teb-tebes tanba komunidade hela iha bairo Aspol ne’e maioria estudante pre-primaria too universitariu, balun agora la eskola ona tanba fatin atu hela laiha, osan laiha, uza saida hodi han hemu no selu ba eskola.” Nia konklui.
