Reportajen Silvino Freitas
Relasiona ho rekrutamentu ba kadetes foun Polisia Nasional Timor Leste (PNTL) ba periodu tinan 2025 nian neebe dadaun nee tama ona ba faze teste mediku neebe aprova ona kandidatu hamutuk 10,597 maibe prosedimentu rekruta nian limita kandidatu balun nunee hili sira hahu husi numeiru ida too kuota kada munisipiu nian, nunee kandidatu sira neebe liu numeiru kuota nian sente lamenta ba prosedimentu refere tanba sira nia naran tama hotu lista aprovadu maibe labele tuir teste, nunee kandidatu sira hatoo ona keixa ba Provedoria dos Direitos Humano e Justiça (PDHJ) no sei halo prosesu averiguasaun ba prosedimentu legal rekrutamentu nian neebe publika iha jornal da republica.
Liuhusi Konferensia Imprensa Portavoz Deolando Mendonça dehan, kandidatu neebe aprovadu hamutuk 10,597 husi kandidatu sira nee kandidatu 400 husi kuota kada munisipiu mak sei tuir teste mediku maski sira kategoria aprovadu hotu maibe limita ba sira atu tuir teste mediku maibe sei fo prioridade liu ba kandidatu sira neebe hahu husi numeiru 1 too numeiru kuota kada munisipiu nian, nunee karik kandidatu sira nee maka tuir teste mak iha kondisaun saude neebe la permiti mak sei bolu hikas kandidatu neebe aprovadu iha lista publikasaun nian.
“ami totalmente lamentavel tebes ho desizaun neebe la justu, diskriminativu no la garantia prinsipiu boa governasaun tanba tendensia ba familiarizmu no grupuizmu, tuir ami nia observasaun lista sira neebe ho numeiru kiik maioria husi komadante polisia nia oan no sira nia familia nia oan” dehan Portavoz Deolando Mendonça, liuhusi konferensia imprensa iha salaun HAK Farol, (05/02).
Nia dehan tan, husi lamentavel sira nee mak sira eziji no rekomenda ba Ministeriu Interior no PNTL atu emediatamente anula desizaun atu labele fo deit teste mediku ba kandidatu nain 400 maibe fo oportunidade hotu ba sira neebe kategoria aprovadu, nunee sira mos husu ba KAK no PDHJ ho emediatamente halo investigasaun neebe klean hodi hatene tendensia familiarizmu no grupuizmu iha prosesu rekrutamentu nunee mos sira husu ba parlamentu nasional neebe trata negosiu estranjeiru defeza no seguransa atu halo fiskalizasaun emediata ba prosesu rekrutamentu neebe iha tendensia ba familiarizmu no gupuizmu.
PDHJ Virgilio Guterres dehan, kandidatu kadetes foun sira hasoru malu ho provedor iha pontu tolu mak provedor desidi atu halo ida maka provedor uza nia kompetensia politika hodi halo komunikasaun ho entidade relevante hanesan ministeriu interior no komisariu jeral PNTL nian atu buka hatene detallu husi prosedimentu no mos bele rona prosesu rekrutamentu husi ministeriu no komandu jeral, ida fali maka orienta ona diresaun fiskalizasaun atu hahu oin buka averigua ba desizaun neebe la admiti kandidatu sira ba teste mediku nee nunee ekipa fiskalizasaun sei tuun hodi haree desizaun neebe la admiti sira atu tuir teste mediku, provedor mos orienta ona husi parte legal nian atu halo analiza ba dokumentu lagal sira hanesan jornal republika neebe publika konaba prosesu rekrutamentu nee atu haree mekanizmu sira neebe sai iha jornal republika nee.
“ohin aprezenta nee ami konsidera mos hanesan keixa ida neebe tama mai iha PDHJ nunee komite jestaun keixa nian desidi iha nesesidade ka lae atu halo investigasaun, maibe ida nee sei depende ba relatoriu preliminar husi keixa nian mak atu haree” dehan provedor Virgilio Guterres hafoin hasoru malu ho kandidatu kadetes foun iha hotel excelsior-resort praia dos coqueiros, (05/05).
Provedor dehan tan, sira sei halo konfirmasaun ba prosedimentu sira neebe publika iha jornal republika liga ho prosesu eleminatoriu iha prosesu rekrutamentu sira nunee sira sei halo verifikasaun liuhusi dokumentu legal sira neebe sai baze legal ba PNTL atu halo rekrutamentu refere, nunee provedor bele iha espasu atu halo konfirmasaun ba prosesu refere tuir keixa neebe kandidatu sira aprezenta ba prosesu sira neebe ultrapasa hotu ona mai too iha teste mediku, nunee antes ba teste mediku provedor sei fo sai rezultadu averiguasaun liga ho prosesu rekrutamentu refere.
