Reportajen David da Costa
Funu iha médiu oriente, nia impaktu sosial sei sae makaas iha Timor-Leste, bainhira mina folin sa’e ona, inklui ai-han sira, tanba krize finansas, tanba ne’e governu sei prepara hodi halo diskusaun ba ida ne’e.
Vise-Primeiru-Ministru no Ministru Koordenadór Asuntus Sosiais, Mariano Assanami Sabino, hateten, funi iha médiu orente ne’e nia impaktu sosial ne’e maka’as no nia impaktu sei to’o mai Timor-Leste, tanba ne’e governu sei prepara atu halo diskusaun kona-ba nia impaktu sira.
“Prontu ne’e ita tenke preparadu, diskusaun tenke la’o, impaktu sosiál ne’e sei maka’as, tanba ne’e mak ita haree hela ida ne’e, funu iha ne’ebá ne’e impaktu ne’e sei mai,” dehan Mariano Assanami Sabino ba jornalista sira iha Hotel Timor, Kuarta 11/02.
“Tanba Iran ne’e produz fatin mina ne’ebé mak boot, se ita mós produz ona ita-nia mina foun ne’e karik ne’e iha benefisiu ba ita tanba mina folin sa’e ita mós faan ita-nia mina,” nia afirma.
Nia esplika, maibé tanba Timor-Leste depende fali mina husi li’ur mai. Entaun governu antisipadamente governu haree ona ida ne’e, sempre preparadu, nasaun soberania ne’e tenke preparadu la’ós akontese tiha foin prepara.
“Nune’e, asuntu sosiál prontu ita preparadu katak ita haree de’it ai-han, ita iha rai nusa mak ita la produz, katak la’ós rai ne’e de’it mak prodús, ema ne’e importante tanba ne’e ita utiliza rai ne’e ho di’ak,” nia subliña.
Tanba ne’e iha ona kordenasaun ho asuntu ekonomia para antisipa ida ne’e, bainhira folin mina sa’e, kompañia balun mós kordena ona oinsá sira antisipa bainhira folin mina ne’e sa’e.
“Se krize mina ne’e mak sa’e, sei fó impaktu mós ba ai-han, tanba sei iha krize finansa tanba folin mina hanesan ne’e ai-han mós nia folin sei nune’e, ne’ebé funu ne’e la di’ak ida,” dehan Mariano.
Tanba ne’e, Timor-Leste nu’udar nasaun ida, jerasaun ida ne’e tenke mantein nafatin nia pozisaun katak matenek la’ós atu halo funu maibé iha matenek para atu kria Paz, sivilizasaun. Maibé matenek para kria nasaun ida ne’ebé inovativu, kreativu mais para atu dezenvolve, atu hamosu ekonomia ne’ebé di’ak no ema hotu moris saudável.
