Reportajen David da Costa
Prosesu rekrutamentu ba kadetes foun Polícia Nasionál de Timor-Leste (PNTL), sei hein desizaun husi Governu antes ezekusaun. Tanba ne’e seidauk bele fó komentáriu kle’an, agora hela iha faze hein despachu ofisial husi Governu.
Segunda Komandante Jerál Polícia Nasionál de Timor-Leste (PNTL), Komisária Asistente Polísia Natércia Eufrásia Soares Martins, hateten, prosesu rekrutamentu ba kadete PNTL foun sei hein hela desizaun husi Governu antes atu ezekuta.
Tanba ne’e, PNTL seidauk bele kontinua prosesu refere tanba seidauk simu despachu ofisial husi autoridade kompetente, nune’e instituisaun tenke hein ordem klaru molok avansa.
“Rekrutamentu ba kadetes PNTL foun ida ne’e ami hein despasu husi governu, depois mak ami sei ezekuta, tanba ami sei hein hela despasu, ha’u sei labele fó komentáriu. Orsida ha’u nia komentáriu ne’e bele sala tiha,” dehan Segunda Komadante Jerál Polícia Nasionál de Timor-Leste (PNTL), Komisaria Asistente Polisia Natercia Eufrazia Soares Martins, ba jornalsita sira iha Palásiu Prezidensial Bairo-Pite, Sexta 17/04.
Antes ne’e iha loron 25 Marsu 2026, iha reuniaun Konsellu Ministrus analiza aprezentasaun hosi Ministru Interiór, Francisco da Costa Guterres, kona-ba konkluzaun relatóriu finál hosi Komisaun Monitorizasaun no Fiskalizasaun Konkursu Públiku Admisaun ba Kursu Formasaun Ajentes PNTL nian, ne’ebé kria tuir Rezolusaun Governu numeru 10/2026, loron 11 fulan-fevereiru, ne’ebé identifika evidénsias sufisientes lubun ida hodi hatudu ezisténsia irregularidades materiais ne’ebé grave iha prosedimentu konkursu nian ida-ne’e.
Relatóriu ne’e mós aprezenta medidas estruturál lubuk ida ne’ebé sei adota ba konkursus iha futuru no rekomenda posibilidade atu instaura (hahú) prosedimentus hodi buka-hatene responsabilidades, kona-ba kondutas ne’ebé bele sai nu’udar violasaun ba devér funsionál ka norma legál sira.
Haree ba irregularidade ne’ebé identifika ne’e, Konsellu Ministrus aprova projetu Rezolusaun Governu ne’ebé determina anulasaun parsiál ba Konkursu Públiku Admisaun iha Kursu Formasaun Ajentes Polísia Nasionál Timor-Leste 2025 no mandatu ba abertura konkursu iha tinan 2026.
Rezolusaun Governu ne’e determina repetisaun provas selesaun (kulturál, psikolójika no saúde) ba kandidatu hotu-hotu ne’ebé admitidu iha faze inisiál (prova dokumentál) konkursu nian.
Aleinde ne’e, Ministru Interiór hetan instrusaun atu nomeia juri foun ida, ho kompozisaun reforsada ida ne’ebé inklui entidade nasionál no internasionál sira ho kompeténsia rekoñesida, no atu kria Komisaun Supervizaun no Fiskalizasaun independente ida, ho partisipasaun parseiru internasionál sira, ho objetivu atu garante transparénsia, legalidade no imparsialidade hosi faze hotu-hotu prosesu nian.
Rezolusaun Governu ne’e hato’o mós rekoñesimentu ba dedikasaun no serbisu ne’ebé Komisaun Monitorizasaun no Fiskalizasaun hala’o, hodi destaka ninia kontribuisaun ba salvaguarda kredibilidade instituisaun públika no direitus sidadaun sira nian.
