Home Notisia OJE 2021, Komunidade Liquica Area Rural Ezije Asesu Ba Estrada, Bee...

OJE 2021, Komunidade Liquica Area Rural Ezije Asesu Ba Estrada, Bee Moos no Eletrisidade

768
0
Uma antigu Portugues iha municipio Liquica. [Foto: Copyright Google | 20.04.2020]

Reportazen Adroaldo ‘Saretukau’

Aniversáriu Proklamasaun Independénsia unilateral Timor-Leste nian ba dala-45, ne’ebé komemora iha munisípiu Liquisa, ne’ebe hetan antusiasmu hosi komunidade sira iha Liquisa no komunidade balun hosi Dili.

Liu hosi  komemorasaun loron istoriku ne’e, Neon Metin dadalia ho komunidade sira ne’ebe asiste seremonia refere, hatoo sira nia esperansa ba ukun  nain sira atu tau matan ba komunidade sia nia problema ho seriu no justu liu ba bee moos, Estrada no eletrisidade.

Komunidade Suku Lauhata, Postu Bazartete, Silvino Ribeiro dos Santos ho naran kódigu “Fo laran Hadomi” husu ba governu atu tinan-tinan la’os debate de’it orsamentu, maibé nem orsamentu no dezenvolvimentu atu to’o iha povu nia liman.

“Governu da-walu ne’e mais ou menus implementa buat ne’e di’ak ba dezenvolvimentu ne’e to’o duni povu nia liman laran, atu povu sira sente katak ita ne’e ukun-an duni,” dehan Silvino ba Neon Metin iha Lauhata iha  komemorasaun 28 Novembru, 28/11.

Nia hatutan durante tinan hirak liu ba estadu debate orsamentu hodi temi povu nia naran, maibé povu seidauk sente loloos dezenvolvimentu iha sira nia fatin.

“Ami suku tolu eletirisdade seidauk tama, estrada rural ne’e importante, karik orsamentu ne’e aprova, estrada rural sira ne’e hosi suku ba postu, atu ami povu bele lori sai ami nia ai-han mai sidade, tanba ami mai susar tebes, ami nia ai-han iha maibé paling ami lori kilo ida ka rua, ami labele tutur ida barak ne’e mai”, tenik Silvino.

Nia husu li-liu konaba asesu estrada tanba ai-han barak liu iha foho, maibé estrada ne’ebé difikulta halo povu susar lori sira nia produtu tun ba sidade ka merkadu, hanesan Postu Bazartete, Leorema, Asumanu, Darlete no sira seluk tan.

Iha parte sorin inan feto, Silvina dos Santos iha esperansa boot hadi’a hela fatin ho di’ak, atu nia mos bele sente moris ho dignu tanba nia mos idade aumenta da-dauk ona.

“Ha’u tanba ferik ona, ha’u kaer serbisu mos labele ona, ami hetan osan terseira idade, se estadu hanoin halo de’it ami nia uma mos to’o ona,” dehan Silvina.

Iha sorin seluk komunidade Lauhata, Mateus Lobato dehan osan povu nian ne’ebé atu diskuti iha Uma Fukun Parlamentu Nasioanal atu hadi’a no kanaliza netik iha komunidade sira nia leet, tanba bee sai problema to’o ohin loron

 “Ami iha foho ne’ebá presiza liu mak bee, dala ruma kalan mos ami ba kuru bee, kalan toba la dukur, tanba kuru bee matan hadau malu mate, kuru bee masa ida. Hanesan tuku 12 ka tuku ida ami la toba ona hodi ba kuru bee”, tenik  Mateus Konfesa ba Neon Metin, 28/11.

Nune’e mos Komunidade Lauhata, Anita da Silva ezije atu rezolve problema la asesu bee to’o ohin loron

 “Ba ami bee tanba bee ami buka hadau malu mate, bee matan ona ida mais susar, bai-loro hanesan ne’e hadau malu los, kasian ami susar tebes asesu bee,” hateten inan feton ne’e ho triste ba Neon Metin.

Problema fundamental ne’ebe sira hasoru mak la asesu bee moos no Estrada,“ami komunidade buka naha tutur los to’o merkadu, iha Metagou (fatin nia naran) ho kareta ho motor maibé ami la iha. Ami estrada aat, tun mos la di’ak sa’e mos la di’ak, naha sira ne’e ami tutur de’it”.

“Sorti di’ak kareta ba, sorti ladi’ak kareta la ba ami tutur de’it, todan atu mate mos ami pasensia de’it, ohin lori la hotu aban lori fali,” nia haktuir ba Neon Metin iha komemorasaun loron proklamasaun independénsia ba dala-45 iha Likisa.

Nia hateten bee ho estrada mak importante liu iha sira nia fatin, problema refere difikulta tebes sira nia moris, tanba ne’e nia husu atu governante sira tau matan no rona netik sira nia lian.

Iha fatin hanensan komunidade Joanina Fernades husu atu atu hadi’a sira nia estrada nomos instala ahi ba sira iha sira nia aldeia.

“Li-liu ba ami mak estrada no ahi tanba iha ami aldeia Kamale-Hun estrada agora ne’e aat, ahi seidauk tama hotu, karik ne’e boot sira bele tun direita hodi haree, tanba bee ho ahi ami balu mos seidauk hetan,” Joanina hateten iha kampu isar Bandeira Pilila, suku Lauhata, sábadu, 28/11.

Komunidade Joanico dos Santos Ribeiro husu atu orsamentu estadu ne’ebé aprova tenki uza ba hadi’a povu nia moris.

“Difikuldade ne’ebé komunidade hasoru mak hanesan estrada, bee mos, halo uma ba vulneravel kbiit laek sira,”dehan Joanico

Joanico husu atu governu tau matan ba povu ho sériu atu sira bele sente duni ukun rasik aan ida ne’e.

Print Friendly, PDF & Email

LEAVE A REPLY

Please enter your comment!
Please enter your name here