Reportajen Estajiariu Isac Sarmento
Klibur Estudante no Juventude Baguia(KEJB) realiza konferensia imprensa hodi ezize parte governu atu toma desizaun bá problema infraestrutura estrada rural ne’ebé mak dadaun ne’e komunidade Postu Baguia Munisípiu Baucau infrenta, tanba estrada ne’ebé aat difikulta tebes komunidade sira halo atividade ekonomia, saúde no mós Edukasaun.
Portavoz Florinda Viana dehan, udan ho intensidade aas hahú husi loron 11 to’o 14 Maiu 2026 estrada iha área Basarawai, Suku Hae-Coni komesa sofre estragus hodi difikulta tebes movimentasaun komunidade nian, nune’e iha loron 15 Maiu 2026 udan amenta ho intensidade ne’ebé maka’as liu hodi halo mota Basarawai kotu totalmente hodi interope transporte públiku no pribadu ne’ebé mak atu halo movimentasaun, nune’e atu responde bá situasaun refere parte autoridade Suku no mós komunidade organiza malu hodi harii ona ponte tradisionál provisóriu ne’ebé uza ai no aú de’it, maibé ponte refere la garante seguru tanba karik volume bee aas bele fó risku bá utilizadór Sira.
“Problema infraestutura lá limita de’it iha Basarawai, área sira seluk hanesan Bubu-Lubu, Samalari, Lakamutu, Larisula, Defawasi, Wakala, Alawa Kraik no Alawa Leten mós infrenta kondisaun estrada aat no rai monu ne’ebé difikulta movimentasaun komunidade” dehan portavóz Florinda Viana liuhusi konferénsia imprensa ne’ebé realiza iha jardín 5 de maio, (03/06).
Nia esplika, problema ida ne’e fo impaktu tebes bá komunidade atu lori produtu agrikultura bá fa’an iha Ossu-Huna, Baguia Vila no mós Munisipiu Baucau, nune’e mós fó impaktu bá estudante sira ne’ebé atu halo movimentasaun bá eskola hodi tuir prosesu aprendizajen, tanba ne’e kuaze semana tolu ona prosesu aprendizajen lá la’o ho efetividade, nune’e mós kondisaun estrada ne’ebé kotu totál fó risku boot bá pasiente sira ne’ebé presiza transfere bá sentru saúde Baguia, ospitál Referál Baucau no ospitál Nasionál, sira konsidera problema estrada ne’ebé komunidade infrenta atualmente la’os de’it problema infraestrutura maibé problema dezenvolvimentu no direitu báziku komunidade nian, nune’e sira ezize parte kompetente atu tau bá seriedade hodi rezolve problema refere iha tempu badak nia laran.
“husu bá Governu no autoridade relevante sira atu normaliza imendiatamente estrada husi Baguia Vila bá Suku Hae-Coni, Ossu-Huna no Afaloicai” dehan portavoz Florinda.
Estudante sira mós ezize bá deputado sira atu halo fiskalizasaun efetiva no lori problema komunidade sira iha baze hodi halo diskusaun iha parlamentu nasionál atu governu bele toma desizaun iha nivél nasionál, KEJB mós husu bá Parlamentu Nasionál atu fó prioridade bá aprovasaun no alokasaun orsamentu bá setór produtivu no infraestrutura ne’ebé direitamente afeta bá povu nia Moris.
