Reportajen David da Costa
Governu Timor-Leste no Governu Austrália, liuhusi nia embaixadora iha Timor-Leste, ohin ofisialmente inaugura Projetu Demonstrasaun Estrada Betaun Reforsadu ho Fibra (FRC) dahuluk iha Timor-Leste, iha Suku Lihu-Samalete, Postu Administrativu Railaku, Munisípiu Ermera.
Ministru Obras Públikas (MOP), Samuel Marçal, hatete, atividade ne’e hanesan projetu pilotu ida atu demonstra utilizasaun fibra ne’ebé bele kahur hamutuk ho material konstrusaun seluk, hanesan simentu, raihenek no krikil, hodi aumenta kualidade no rezisténsia estrada durante implementasaun.
“Ita mós sei implementa sistema hanesan ne’e iha área 10 iha territóriu nasionál ho orsamentu ne’ebé Governu disponivel,” dehan Ministru Obras Públikas, Samuel Marçal, iha komunikadu imprensa ne’ebé Neon Metin asesu husi media Embaixada Austrália iha Timor-Leste, kinta 11/06.
Projetu demonstrasaun ne’e aliña ho Planu Estratéjiku Dezenvolvimentu Timor-Leste no prioridade sira husi IX Governu Konstitusionál, ne’ebé fó énfaze ba reabilitasaun rede estrada no envolvimentu kontratór lokál sira iha dezenvolvimentu infraestrutura rurál.
Embaixadora Austrália mai Timor-Leste, Caitlin Wilson, hatete, Governu Austrália orgullu atu kontinua parseria ho Governu Timor-Leste hodi entrega infraestrutura estrada ne’ebé reziliente ba mudansa klimátika no benefisia ba komunidade lokál sira.
“Liuhusi introdusaun teknolójia FRC, ita harii infraestrutura ne’ebé resistente no durável, ne’ebé garante asesu seguru no konfiável liu ba komunidade lokál sira, maski durante kondisaun tempu ekstremu,” dehan Caitlin Wilson.
Entertantu, serimónia inaugurasaun ne’e ofisializa husi Ministru Obras Públikas, Samuel Marçal, hamutuk ho Embaixadora Austrália iha Timor-Leste, Caitlin Wilson, no Prezidente Autoridade Munisipál Ermera, José Martinho dos Santos Soares.
Iha eventu ne’e mós partisipa reprezentante Governu, lideransa komunitária no membru komunidade sira husi Suku Lihu-Samalete postu administrativu Railaku, Munisípiu Ermera.
Projetu ida ne’e marka demonstrasaun dahuluk ba utilizasaun teknolójia FRC iha Timor-Leste. Teknolójia ne’e koko modelu konstrusaun estrada inovativu no reziliente ba mudansa klimátika, hodi hametin infraestrutura no apoia komunidade sira iha nasaun tomak.
Projetu ne’e implementa liuhusi parseria entre Governu Timor-Leste no Austrália, ho apoiu husi programa PARTISIPA Austrália nian.
FRC maka teknolójia ida ne’ebé kombina fibra makro polipropilenu ho betaun ka massa simentu, hodi aumenta forsa, durabilidade no reziliénsia infraestrutura estrada nian.
Projetu demonstrasaun ne’e hadi’a ona estrada rurál raihenek ida ho extensão kilómetru rua ba estrada simentu reforsadu ho fibra, ne’ebé resistente liu. Estrada ne’e fasilita asesu ba komunidade sira atu to’o merkadu, eskola, sentru saúde no servisu esensiál sira seluk.
Bazeia ba rezultadu positivu husi projetu pilotu ne’e, Governu Timor-Leste, liuhusi Ministériu Obras Públikas, planeia atu habelar implementasaun teknolójia FRC ba munisípiu 10 iha nasaun tomak, hodi hametin konetividade rurál no apoia dezenvolvimentu ekonómiku lokál.
