Mariano Fatubai Mota, laos naran ida ne’ebe temi deit iha arikivo historia nian. Nia nunka uza naran klandestina, nia naran revolusionariu ne’ebe koinesidu ona mak naran bolu ‘Marito Mota’, nu’udar figura proeminente ida iha história luta ba autodeterminasaun Timor-Leste nian. Moris iha família laran-di’ak, iha Díli, Culuhun, iha loron 11 Julho 1970. Marito Mota hatudu ona ninia aten brani no dedikasaun desde idade nurak tebes. Nu’udar oan dahuluk husi maun-alin na’in neen, nia simu edukasaun no valor patriotismo husi ninia inan-aman, Senhor Cabo Alberto Mota no Professora Judite Fatubai.
Iha idade nurak tebes Marito Mota experiensia ona moruk husi brutalismo invasaun no okupasaun Indonesia nian tanba aman nu’udar tropa efetivo iha Forcas Armadas Portuguesas maibé afilia ba Movimento Libertação Nacional no hakuak prinsipiu ukun rasik-an, ne’ebe moris ho Fretilin. Experiência moruk ne’e hamosu espirito luta no sai fini ba Marito Mota nia prinsipiu hodi partisipa iha prosesu luta. Fini ne’e moris no buras liután wainhira saudoso atinge idade jovem no halibur kolega sira-ne’ebé komunga prisipio ukun rasik-an ne’e.
Ohin ita hanoin hikas Marito Mota laos nudar faktu ida. Maibe hanoin hikas nia nudar ema ida brani, firmi, no kumprimetidu profundamente ba idea ne’ebe joven sira fiar bai ha tempu luta nian.
Tuir mai historia uituan hosi Marito Mota, hosi liafuan sira mak nia konta rasik iha intervista ida iha fulan Maiu 2025 nia laran, hodi koalia kona ba ninia hanoin sira, no ninia involvementu sira iha luta ba ukun rasik-an nian.
Resuresaun Juventude iha Fahe Malu Nia Laran
Hau sei hanoin hetan, Dili nia situasaun iha tinan 1985 to’o 1987, juventude iha vila, sidade Dili ne’e laiha unidade. Depois ita nia resistensia armada mos sei fraku. Funu nee nia kontinuasaun nee mai iha vila iha tinan 1985-86 nia laran. Agora oinsa juventude iha tempu ne’eba luta prosesu ukun rasik-an, ida nee ita hahu ona atividade anti-pendatang. Ita sempre husu ema Indonesia sira, “kapan pulang?”. Ita hahu halo ida ne’e, maibe Indonesia forma nia politika ida, soran (adu-domba) joven sira iha bairu-bairu. Purezemplu, bairo Kuluhun ho Bekora haree malu la diak, iha Bidau sempre konfrontu entre joven sira.
Entaun TNI (Tentara Nasional Indonesia) aproveita oportunidade ida soran joven iha tempu neba. Politika ne’e lao mai to’o tinan 1987-88 nia laran. Altura neba, ami nain lubun oan ida, inklui Armando da Silva (matebian), ami hanoin ona atu halibur uluk joven sira ne’ebe maka iha hanoin hakarak luta ba ukun rasik-an. Entaun iha ne’eba ami komesa halibur malu hodi hapara ona konfrontu joven entre bairu. Ami komesa kria unidade entre bairu ida ho bairu seluk. Ami foti sira nia responsavel, sira ne’e domina iha sira nia bairu laran. Ne’e ami foti ida-ida, hahu halo maun alin. Depois iha tinan 1989, iha vizita Santo Padre nian mai Dili. Iha tempu ne’eba sei grupu-grupu hela, depois serbisu ne’e mos klandestina hela iha tempu neba. Ami hanoin atu kria uluk unidade entre joven bairu iha dili laran. Altura neba situasaun nee laos fasil. Ita atu kria gurpu ida ne’ebe hakarak luta ba ukun rasik-an. Ita hatene katak Indonesia hatete ba mundu internasional katak FRETILIN iha timor fraku ona, liuliu iha ai-laran.
Hamoris FITUN, Naran Ida ba Luta Juventude Nian
Iha momentu neba ne’e ami simpatia tebes ba FRETILIN atu kontinua luta ba ukun-an. Ami sei joven ami hatene unika mak FRETILIN. Entaun ami komesa iha hanoin ona, tenke harii juventude resistensia FRETILIN ida para fo hanoin nafatin ba mundu katak esistensia FRETLIN sei existe nafatin iha Timor. Iha altura neba, depois de vizita Santo Padre, atividade primeiru maka FITUN halo hamutuk ho estudantes no joven sira seluk, iha John Monjo (Ambasador Amerika nian ba Indonesia 1989 – 1992) nia visita, iha Janeiru 1990, delegasaun Amerika nian iha altura neba.
Altura neba grupu joven iha bairo-bairo iha rivalidade forte. Purezemplu iha Kuluhun nian ho grupu Abilio Mausoko nian ami ladiak malu lori to’o ba baku malu. Iha manifestasaun kontra Indonesia nian ida, ema kaptura ona ami iha Lecidere. Tempu neba ami nia posizaun ne’e rende hotu. Sira haruka tau liman ba hotu ulun, hanesan ne’e (hatudu liman rua halo letra X iha ulun). Tempu neba hau tu’ur besik loos Abilio Mausoko. Mausoko dehan mai hau, “sakana o mak ne’e, o mos hakarak ukun-an, depois ami rua hakuak malu”. Entaun husi ne’eba to’o ohin loron ami halo maun alin. Unidade joven nian ami hahu ona. Ida ne’e komesa loke ona ita nia hanoin halo relasaun diak ba malu.
Iha tempu hanesan grupu ida ne’ebe ami nain 7 inisia ne’e komesa boot ba beibeik. Entaun ami komesa hanoin katak tenke fo naran ida. Ho hanoin katak Indonesia hatete FRETILIN nia existensia fraku ona, entaun ami hanoin katak diak liu fo naran FITUN ne’ebe signifika FRETILIN Iha Timor Unidade Nafatin. Hafoin ida ne’e ami husu apoiu ba ita nia forsa armada, liuliu ba Maun Xanana atu rekonese existensia organizasaun FITUN nian. Iha 19 Abril, ami nain 42 pesoas ami hahu halo juramentu hemu-ran. Fatin ne’ebe ami desidi mak Pai Nosso, Cimiteiru Santa Cruz nia laran, iha kalan bo’ot tuku 12. Ama nain 42 pesoas ne’e tama ida-idak ba rate laran ho nonook. Altura ne’eba, ami treina ona PSHT iha Ranting Taibesi.
Juramentu Hemu Ran iha Kalan Fahe Rua
Iha inimigu nia-let, sira hafuhu tuir ami, maibe ami la-tauk, juramentu ne’e tenke halo. Ho segredu ne’ebe metin ami tama iha rate laran, aserta loos 12 oras kalan bo’ot, 19 Abril, ami tu’u ami nia liman halo ran, tau ba tua diplomat laran, kahur ami nia raan ho bandeira FRETILIN ho RDTL, tau Iha Nossa Senhora nia ain, depois ami hemu-ran ne’e halo juramentu. Ami halo ida ne’e nudar prosesu ida.
Juramentu ne’e primeiru hatete katak ho ran ne’e ohin ba oin entre ita ne’e mate ka moris luta ba indepedensia, luta ba buka ukun rasik-an. Pontu Segundu entre ita 42 pesoas ne’e, se mak hetan kapturasaun labele deskobre o nia maun-alin. Pontu Terseiru mak ita hanesan maun-alin kabun laran liu fali maun alin kabun laran.
Pontu 3 nee maka temi iha juramentu 20 abril 1990. Husi nee FITUN hamriik iha Abril ne’e duni. Depois ami, hau Luis, Nando Gulit, Armando ho Nando Mara sae ba Ainaro. lori ho lista ne’e ba husu rekonesimentu husi forsa armada ba existensia FITUN nian. Maibe altura ne’eba ne’e, iha Ainaro, TNI la fo fatin, entaun ami la konsege hasoru maun Xanana. Hafoin loron ida tuir mai mak foin hasoru maun Xanana hodi nia rekonese organizasaun FITUN ne’e.
FITUN mak organizaun ne’ebe harii iha vila laran iha tempu situasaun difisil. Harii organizasaun sira hanesan ne’e la fasil. Atividade ne’ebe FITUN halo maka ita espalla isu kontra Indonesia. Iha oportunidade balun hanesan loron Indepedensia Indonesia nian, 17 Agusto, ho 17 Jullu loron Integrasaun, iha tempu kalan ami soe pamfletu anti-Indonesia, hasae bandeira nasional iha rate Santa Cruz, iha eskola Xina, hasae iha SMA 1, hasae iha Dolok-oan Area Branca. Kuaze 17 Jullu kada tinan ami sempre hasae bandeira, hodi hatudu katak ita-nia ezistensia, ita nia rezistensia nee aumenta ba beibeik, no la gosta prezensa Indonesia nian, no la simu integrasaun.
Kuandu FITUN hamriik ona, ami halo kontaktu mos ho kuandru rezistensia sira. Sira mos komesa hetan perseguisaun ona husi militar Indonesia. Ami mos iha ona kontaktu ho estafeta Sole Sole depois ho maun Antonio Aitahan Matak. Ami loke relasaun ho ita nia forsa armada. Hosi Ainaro altura neeba halo kontaktu ho maun Xanana, Mauhunu iha Ainaro. Halo ligasaun mos ho Mahudu iha Ainaro bainhira nia fila mai vila. halo ligasaun mos ho Rejiaun 1. Altura neba komadante Rejiaun 1 mak Komadante Lere. Saida maka ita fo apoiu ba sira mak halibur hosi membru sira: hahan, farda, kartus, bikan masa, kanuru sira, ho pilla depois estafeta mai foti lori ba sira iha ai-laran.
Ba Ai-laran no Hakarak sai FALINTIL
Luta bele halo liu hosi dalan oioin maibe hau sente katak karik diak liu mak hau hela hamutuk ho FALINTIL sira no kaer kilat. Hau brani ba halo ida ne’e.
Loron ida kuandu hau ba Rejiaun 1, hasoru malu ho Komadante Lere. Hau hakarak hela iha neba deit ona. Hau hakarak sai FALINTIL, kaer kilat. Komadante Lere hateten ba hau, “ami presiza funu ne’e halo iha vila, iha sidade, ne’e ami presiza imi.Iha nee la presiza tan ona elementu. Iha nee kilat mos laiha, hahan mos la iha, imi mai sei lori tan problema ba ami”.
Situasaun momentu neba iha ai-laran ne’e Indonesia domina hela. Abrigu ida labele ema barak mak iha laran, ema nain 4 ka 5 deit. Entaun ita-ba iha neba bele aumenta tan problema ba FALINTIL sira.
Altura neba hau preseguido hela iha vila, TNI buka hau, tan ne’e mak hau hakarak ba ailaran, hamutuk ho FALINTIL sira. Maibe sira duni hau fila. Sira dehan, “ami presiza imi nia prezensa. Ami presiza imi nia brani. Funu iha ne’e la iha ona. Funu agora ita muda ba vila, funu urbana”.
Hakarak Hetan Biru (kakaluk)
Hamutuk tiha ho FALINTIL sira ba loron balun, loron ida hau husu atu fila ba Dili. Entaun hau husu ba Komandante Lere, “Maun hau presiza deit mak biru”, katuas altura ne’e la komprende biru. Entaun nia husu Vasco Criado, “biru mak saida?”. Depois Vasco mak esplika dehan, “ita nia alin husu kakaluk atu lori ba halo salva guarda tan iha vila sira enfrenta direta ema ho kilat”. Entaun katuas Lere hateten direta ba hau katak, “hau nia alin hateke ba hali hun neba”. Hau hanoin hateke ba hetan biru iha ne’eba. Maibe hau hateke ba hetan sanan kalen. Depois Lere dehan, “ida ne’eba ne’e, imi kuandu iha vila la haruka hahan mai ona, Indonesia lalika tiru ami mos ami mate deit. Ami nia biru mak ne’eba ne’e”. Depois Komandante Lere hatutan, “hau nia oan fila ba, ami presiza mak imi organiza malu. Ida ne’e mak ita nia rezistensia, tau hamutuk forsa, armada ho organizasaun juventude nia forsa”.
Bainhira responsavel bairo sira komesa koinese malu, amizade entre bairo nian hahu metin, militar Indonesia hahu preokupa. Entaun sira hanoin atu estraga tiha amizade ne’ebe iha hodi kria Garda Paksi (Garda Muda Penegak Integrasi).
Membru Garda Paksi sira ne’e mai husi ne’ebe, mai husi ema eis-rezistensia balun, maluk sira ne’ebe uluk TBO (Tenaga Bantuan Operasi). Indonesia komesa forma buat sira ne’e para halo balansu ho joven rezistensia sira. Atu nune’e kuandu ita halo atividade ruma, sira maka halo atuasaun hasoru ita. Indonesia sira iha kotuk, sira mak iha oin. Ne’e atu nafatin hatudu ba mundu katak Indonesia laiha problema ho ita, maibe ita timoroan mak iha problema ba malu, iha konflitu nafatin entre ita.
