Reportajen David da Costa
Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raul “Falur Rate Laek” hatete katak lakon Saudozu Francisco Guterres Lú Olo la’ós deit lakon kolega ida, maibé lakon irmaun no kompaneiru ne’ebé liu husi dalan moris naruk hamutuk iha luta rezisténsia, susar no prosesu harii nasaun Timor-Leste.
Xefe Estadu-Maior Jenerál FALINTIL-Forsa Defeza Timor-Leste (F-FDTL)Tenente-Jenerál Domingos Raul “Falur Rate Laek” hateten, Sentimentu umanu ne’e hanoin katak sentimentu buat kiik ka, agora nia ne’e família depois desde vida juventude eskola hamutuk depois, juventude halo funu hamutuk, rezisténsia hamutuk, susar, terus hamutuk, depois mai ukun aan harii nasaun hamutuk sentimentu la’ós uitoan. Sentimentu boot liu mais maneira, ida ne’e mak siklu vida ema moris iha mundu nian.
“Ne’ebé bainhira balun jerasaun ida tenke troka jerasaun ida, ne’ebé ita hotu lamenta, triste mais ita dejeza katak, ninia klamar ne’e bele ba sai di’ak, no ninia legál ne’ebé nia husik hela ne’e mak ita lori halo referénsia nafatin ba nia,” dehan Xefe Estadu-Maior Jenerál FALINTIL-Forsa Defeza Timor-Leste (F-FDTL)Tenente-Jenerál Domingos Raul “Falur Rate Laek” ba jornalista sira iha rezidénsia Saudozu Lú-Olo nian iha Faról, Tersa 23/06.
Nia dehan kona-ba Saudozu Lú Olo nian moras ne’e, nia mos rona de’it husi médiku sira hatete moras korasaun, depois antes nia atu ba Malázia, iha 23 Maiu mai ho médiku subriñu ida, mai iha ne’e nune’e atu kumprimenta, despede nia atu ba, mais Saudozu ko’alia di’ak hela. Maibé Problema uitoan ho nia fuan atu ba opera no hadia tiha.
“Ne’ebé ami hotu iha ne’e kontente, nia la’o di’ak hela, ami hamnasa hela varanda ne’e, ami ko’alia hela di’ak, agora fila fali mai ho kaisaun, mais ne’e realidade tenke simu,” nia dehan.
Nia subliña, Saudozu Lú Olo la’ós deit hanesan kolega, maibé hanesan irmaun, kompaneiru no kamarada besik ida ne’ebé sempre hamutuk iha momentu difísil sira. Relasaun ne’ebé harii liu husi tempu no esperiénsia moris halo nia konsidera Lú Olo hanesan ema ne’ebé besik liu, liu fali maun-alin rasik.
“Lú Olo ha’u konsidera ha’u nia irmaun, ha’u nia kompaneiru, ha’u nia kamarada, ema ne’ebé proximu liu ha’u situasaun difisil liu ami hasoru malu, liu fali maun alin rasik,” afirma.
Saudozu Lú Olo nia hanesan figura lideransa ida ne’e sei hanoin nafatin liuhusi ninia kualidade ne’ebé mak hatudu moris ho humilidade, pasiensia no servisu ba povu. Maski iha pozisaun boot iha lideransa, nia la’ós buka benefísiu pesoál ka riku ba nia an rasik, maibé kontinua hamutuk ho aspirasaun povu Timoroan sira nian iha prosesu harii nasaun independente.
Ninia vertude boot sira mak sai hanesan parte husi legadu ne’ebé nia husik hela, liuliu pasiénsia no humilidade, no prinsipiu atu la tau interese pesoál iha oin bainhira povu seidauk hetan moris-di’ak ne’ebé hakarak. Ninia dalan moris no lideransa sai ezemplu kona-ba servisu ho laran nakloke no responsabilidade ba nasaun.
“Ninia kualidade di’ak liu mak apezar homiliasaun, buat bara-barak ba nia sempre ho homilidade, pasiensia. Depois entre lideransa hotu-hotu, Timor-oan hotu-hotu ne’ebé iha ne’e mak nunka iha tentativa atu buka hetan benefisiu ka riku iha ninia vida iha rai independente ida ne’e. Ne’ebé ida ne’e mak vertude ne’ebé ninia legadu di’ak ruma primeiru pasiensia, no homilidade. Segundu nia lakohi tenta atu riku enkauntu povu ida sei luta ba ninia bem star,” nia dehan.
Saudozu Francisco Guterres Lú-Olo mate iha Ospitál Prince Court Medical Centre, Kuala Lumpur, Malázia, iha loron 21 Juñu 2026, depois de hetan tratamentu intensivu iha ospitál refere. Nia mate hamosu lutu no tristeza boot ba povu Timor-Leste, tanba nia kontribuisaun boot ba luta libertasaun no dezenvolvimentu nasaun nian
