Reportajen Zevonia Vieira
Gabinete Kooperasaun Defeza sente orgullu anunsia kona-ba Troka Koñesimentu Asuntu Espesializadu (SMEE) entre Guarda Nasionál Rhode Island ho Falintil-Forças de Defeza de Timor-Leste (F-FDTL) Komponente Terrestre. Esforsu kolaborativu ida-ne’e hadi’ak FFDTL ninia profisiénsia kona-ba uza no jere kilat kiik no operasaun tiru alvu, subliña forsas armadas rua ne’e nia kompromisu hodi fortalese parseria militár ne’ebé metin no halo operasaun ho di’ak liután.
Liuhusi komunidade imprensa ne’ebe Neon Metin asesu relata katak Major Ezersítu EUA Aaron Harris, ko’alia durante enseramentu ba programa ne’e, “Interkámbiu ida-ne’e nu’udar ezemplu ida ne’ebé di’ak tebes kona-ba Programa Parseria Estaduál iha asaun. Programa ida-ne’e, ne’ebé fundamentál tebes ba haburas relasaun ba tempu naruk, fó dalan ba ita hodi fahe prátika ne’ebé di’ak liu, hadi’ak ita-nia kapasidade no abilidade militár no harii relasaun amizade no kooperasaun ne’ebé duradoura.”
Durante treinu hamutuk ne’e, membru militár sira husi RING fahe sira-nia perisia kona-ba familiarizasaun ba kilat kiik, inklui sesaun detalladu ida kona-ba protokolu seguransa ba armas, prosedimentu manutensaun, no fundamentu ba tiru alvu nian. Soldadu sira familiariza sira-nia an ho kilat oioin, foka liu ba tékniku jestaun, ezersísiu ba asaun imediata bainhira mosu malfunsaun, no aplikasaun pozisaun tiru avansadu. Treinu hamutuk ne’e dezeña hodi kria konfiansa no garante atu pesoál F-FDTL bele opera sira-nia kilat sira ho efikáz no seguru iha senáriu kombate oioin.
Aleinde familiariza ho kilat kiik sira, programa ne’e mós inklui vizaun jerál abranjente ida kona-ba operasaun ba kampu tiru-alvu. Iha segmentu ida-ne’e kobre kona-ba planeamentu no ezekusaun ezersísiu tiru alvu, jestaun seguransa ba operasaun tiru-alvu, no estabelese prosedimentu sira ba kontrolu kampu tiru-alvu. RING nia espesialista sira fahe prátika hirak-ne’ebé mak di’ak liu ba estabelese operasaun tiru-alvu, avaliasaun riskus, no koordenasaun nesesáriu ba operasaun tiru ne’ebé mak efisiénte no seguru. Treinu hamutuk ida-ne’e, nu’udar treinu dahuluk entre parseiru rua ne’e, la’ós de’it hasa’e F-FDTL Komponente Terrestre nia kapasidade operasionál maibé mós hametin relasaun entre forsa militár rua ne’e, haburas espíritu kooperasaun no apoiu malu liuhusi Programa Parseria Estaduál.
