Reportajen Silvino Freitas
Ekipa Konjunta Autoridade Seguransa polisial liuhusi Servisu Investigasaun Kriminal (DSIK) no Diresaun Servisu Informasaun Polísia (DSIP), hamutuk ho Servisu Informasaun N2 husi FALINTIL–Forsa Defeza Timor-Leste (F-FDTL), kontinua sobu tan kazu Scamming Call Centre no detein sidadaun estranjeiru nain 21 iha Bairu Sentral, Aldeia Ailoklaran, Suku Hera, Postu Administrativu Cristo Rei.
Durante operasaun, ekipa konsege halo apreensaun evidénsia barak, hanesan ekipamentu rede internet Starlink, laptop sira, telemóvel sira, kadeira sira, mesa sira ho pasaporte inklui osan balun no ekipamentu seluk tan ne’ebé sei iha prosesu identifikasaun no análiza husi autoridade kompetente.
Komunidade Melciano Gustavo dehan, hahu husi fulan tolu liu ba sira la detekta ema estranjeiru barak iha nee tanba sira nia movimentu sempre iha oras ne’ebé ema la dun barak ka liu liu iha oras ne’ebé ema hotu hakmatek hanesan oras meudia ho lokraik tanba iha oras dader sira nunka sai, sira sai lao de’it ho kalsa badak ba loja sosa sasan maibe loron bailet ne’e sira la sai.
“Sira sai mos uza faru hodi taka ibun ne’ebé nia ibun ho nia oin ne’e la dun detekta, depois operasaun sira iha Dili laran entaun ami hanoin ida ne’e dalaruma sira inklui hotu karik ne’e hanesan ami deskonfia hanesan ne’e” dehan komunidade Hera Meciano Gustavo, iha Hera Ailok-laran, (21/07).
Uma nain Stiven ne’ebe fo aluga uma sidadaun estranjeiru dehan, uma refere uma hela fatin tuir lolos la fo sira atu aluga nunee antes atu aluga sira husu atu halo atividade saida nune’e sira hatan sira husi kompaña ne’ebe buka osan mean ho osan mutin no uma nain mos husu kona ba sira nia atividade la kontra lei sira hatan la kontra lei nune’e sira koalia hodi fo kontratu.
“Sira kontratu ho ami nee halo ba tinan lima maibe sira selu tinan tinan ne’ebe sira paga tiha ona tinan ida primeiru tiha ona kada fulan sira selu $3200 ba uma refere” dehan uma nain Stiven iha Hera Ailokalaran.
Nia dehan tan, sira la deskonfia sira nia atividade tanba sira hahu monta starlink iha domingu sira bolu kompana ida mak mai monta maibe iha loron rua antes sira lori starlink mai hatuur deit iha rai tanba la akapta rede entaun domingu sira bolu fali kompaña balun hodi monta, nune’e uma nain mos fo hatene ba sira atu labele halo atividade sira ne’ebe kontra lei.
“Sira dehan sira nia kompaña husi China maibe sira temi naran, hau husu sira nia lisensa atividade maibe too agora sira seida’uk fo, sira nia maluk ida reprezenta sira ne’e mak hatene ko’alia tetun no hatene koalia lian Cina hanesan ho ami ne’ebe halo kontratu ho ami” dehan uma nain Stiven.
Nia dehan tan, iha tempu loron sira la haree ema barak ema nain 5 too 4 de’it mak halo atividade iha nee maibe la haree sira dada fiu sira dalaruma iha kalan maibe sira mos la konsege haree tanba sira la toba iha uma ne’ebe sira aluga, nunee tanba operasaun neebe komesa kaer ema barak entaun sira hahu deskonafia maibé iha loron hirak liu ba uma nain hahu husu sira kona-ba kompaña legal sira hatan nafain dehan kompaña legal, tanba sira laiha direitu atu tama ba uma laran entaun la haree saida mak iha laran.
