Reportazen Zevonia Vieira
Relasiona ho lamentasaun hosi sekretario Jeral Juventude Demokratiku [SJJ] Munisipiu Dili, Cesar Mau-Loi Amaral, Partidu Demokratiku [PD], Organizasaun Juventude Demokratiku Munisipiu Dili hakarak ne’ebe lamenta ho pozisaun deputadu Adriano do Nascimento tanba dehan la tuir desizaun kolektiva PD nian ne’ebé hatu’ur iha konferensia nasional iha loron 20/2/2020.
Neon Metin halo entrevista via telephone ho Deputadu Adriano do Nascimento konaba ninia pozisaun ba statementu ne’ebe hatoo hosi SJJD. Ba Neon Metin Adriano deklara katak apresia ho SJJD nia opiniaun, hatudu demokrasia lao iha partidu laran no PD valoriza espresaun ema hotu nian.
“Tuir sira nia statementu atu hasai hau ,tanba dehan hau indisiplina, hau hakarak hateten katak hau pronto ho razaun tan deit hau vota afavor ba povu nia moris no nasaun nia moris mak atu hasai hau prontu. Hau prontu lakon hau nia pozisaun hanesan Prezidente CPN iha partidu nia laran no hanesan deputadu iha Parlamentu, duke hau la hare ba povu nia susar, duke hau laiha sentimentu no la salva povu ho ita hotu hosi moras Corona no mos povu ne’ebe uma laiha, bee laiha no mota sobu sira nia haris fatin. Tanba ida ne’e mak atu hasai hau laiha buat ida, hau pronto atu lakon pozisaun, asalkan sira labele hasai tanba hau koruptor. Hau moe kuandu PD hasai hau tanba hau naok povu nia osan, hau nauk estadu nia osan, maibe hau defende povu tanba povu uma laiha, tanba atu kombate moras Corona mak sira hasai hau kontente”, deklara Adriano via telephone 07/04.
Adriano hateten razaun tanba sa vota a-favor ne’e tanba atu hatete deit sim ou nao diskuti ho urjensia, sedauk debate konaba Lei, sedauk halo aprovasaun konaba Lei ne’ebe governu aprezenta, maibe vota a-favor katak alterasaun Lei ne’e urjente.
“Hau afavor ba urjensia tanba governu aprezenta pontu 12 ba deputadu sira, atu husu Parlamentu halo esesaun “pengecualian” aplika rezime duodesimu. Hosi pontu 12 ne’e atu halo esesaun ne’e, labele aplika rumus duodesimu. Iha Lei Orsamentu Jestaun Finanseira ba moras Corona, laos Corona deit, governu husu atu fo esesaun ba moras infensaun sira seluk mos, para governu halo despeza labele tuir rumus 1/12 ka duodesimu”, tenik Adriano.
Adriano mos hateten razaun fundamentu seluk tanba sa vota a-favor ba deskuti ho urjensia tanba governu husu atu halo esesaun hosi duodesimu ba rezidensia embaixador sira nian ne’ebe aluga, tanba embaixador sira aluga uma ne’e tinan ida, selu dala ida, laos duodesimu selu kada fulan. Razaun seluk tanba atu selu tusan, tuir kontratu tenke selu tinan ida dala ida.
“Razaun seluk tanba politika ida ne’e, politika VIII Governu Konstituisional nian, politika iha Nonu governu [IX] ne’ebe hau nia partidu halo koligasaun ne’e sedauk iha, Primeiru Ministru sedauk hetan posse, programa no orsamentu sedauk aprezenta, hau laos vota kontra programa Nonu Governu nian”, hateten Adriano
Deputadu PD ne’e mos hateten vota apfavor ba VIII Governu ho kontinuasaun ba Prezidente, Sekretariu Jeral no Prezidente Organizasaun Mulher Demokrata ne’ebe desde VIII Governu hahu, sira nain tolu vota afavor hela deit, “so hau mak vota kontra, tanba ida ne’e mak hau fo kontinuasaun, hau vota afavor. Agora sira nain 3 la salah maske vota afavor hela deit, maske hanesan opozisaun. Agora hau foin afavor dala ida hau mak salah fali, ne’e injustu. Sekarik hau vota kontra ami nia programa iha koligasaun, mak hau vota kontra, ne’e hau salah”.
Deputadu ne’e hanoin hikas fali lia menon hosi Saudozu Fernando Lasama neebe hanorin PD katak “hau dignidade la as liu diginidade nasaun nian, Asanami hanorin ami katak ba estadu PD laiha rezerva, ba O Timor Maubere Oan Pronto Atu Serbi, se povu agora dadauk uma laiha, se povu Timor iha hela ameasa nia laran iha virus Corona, mak ita rezerva fali ba buat seluk ne’e la bele. Diak liu hau lakon pozisaun nudar Prezidente CNP no Deputadu, dari pada hau lakon sensibilidade ba interese povu ho nasaun ida ne’e nian”.
Lider politiku ne’e mos hateten nudar lider politiku tenke iha sensibilidade sosial, politika no ekonomika. Lider tenke pro povu atu ajuda povu halo sira nia um. Hanesan deputadu tenke hatur dignidade nasaun, tanba se embaixador sira ema duni sai tanba ita nia impase politika no Sistema duodesimu, ne’e diginidade nasaun laiha ona.
“Hau hanesan lider tenke dignifika nasaun ne’e. Tau interese pesoal no partidu nian iha kotuk, ita tau interese estadu, nasaun no povu nia dignidde iha oin. Diak liu hau lakon pozisaun duke hau lakon dignidade estadu, duke lakon povu nia fiar ba hau, tanba povu moris terus hela”, hateten Adriano
