Reportazen Santina Lucia da Costa
Asosiasaun Jornalista Timorl-Lorosa’e (AJTL), realiza programa Editor Club ba daruak nian ho Tema “Hametin Sala Redasaun Ida Ne’ebé Livre no Independente Hosi Intrerferensia Politika no Ekonómia”, ne’ebe halao iha salaun Konsellu Imprensa (KI) iha loron 14/05.
Iha abertura Prezidente AJTL hateten ho ekipa ne’ebe forte bele realiza duni Editor Club iha situasaun Covid-19, koko haknaar an iha ne’eba, fo tempu ne’ebe iha, hodi bele realiza, tanba fo formasaun ka halo diskusaun konaba jurnalismu nian importante tebes, liu-liu iha situasuan kritiku sira hanesan Covid-19.
“AJTL Prontu atu fo tempu hodi halo buat ruma ne’ebe mak bele fo valor ba jornalista sira, xefe redasaun no editor sira ne’ebe mai hosi media oin-oin. Ita haree ba situasaun COVID-19 ne’ebe mak akontese serbisu jornalista nian iha sala redasaun importante tebes, mantein independensia editorial. Ba situasaun Covid-19 informasaun sira ne’ebe mak publika ona iha redasaun presiza ho responsabilidade katak fo informasuan edukativu ba ita nia audensia, liu-liu tuir matadalan ne’ebe Konsellu Imprensa hamutuk ho UNDP, AJTL no TLPU lansa”, hateten Zevonia.
Zevonia haforsa tema ne’e refere duni ba situasaun ne’ebe mak sala redasaun sira hasoru, kontinua halo tuir kodigu etika jurnalistiku no prinsipiu jurnalismu nian, koko atu la halis ba intervensaun hosi liur, liu-liu hosi politiku nain sira.
“Sem kritiku kobaba data no informasaun sira ne’ebe iha, ita sei la halo funsaun hanesan watchdog. Kontinua kontra fake no hoax news ne’ebe mak sei espalla iha social media”, hateten Zevonia.
Iha fatin hanesan Prezidente Konsellu Imprensa, Virgílio da Silva Guterres apresia tebes ho AJTL nia inisiativa hodi halo diskusaun regular liu hosi editor club.
“Liberdade tenki livre uluk husi tauk (free from fear), se ita sei tauk, ita labele mantein ekilibriu, ita kuandu bebas ona, ita livre husi tauk, ita hanesan manu nia la tauk ain-tohar tanba nia fiar iha nia liras”, dehan Virgílio da Silva Guterres iha nia diskursu.
Entretantu Jestór Programa Projetu LEARN PNUD, Tito de Jesus Filipe dehan sira nia serbisu ne’ebe mak iha ligasaun ho Konsellu imprensa no mos AJTL no asosiasaun jornalista sira seluk, liuliu haree ba oinsa mak kontribui ba hametin serbisu jornalizmu ninian, serbisu balun ne’ebe mak ami hala’o tiha ona hanesan kapitasaun ba jornalista sira, iha periodu eleitoral no mos eleisaun, hanoin katak iha tempu agora ami nafatin apoiu husi ajensia KOICA.
“Ami nia komitmentu nafatin ho apoiu KOICA nian no mos UNDP ami ba oin sei ajuda nafatin oinsa mak ita bele hametin liu tan liberdade imprensa iha nasaun ida ne’e.” Deklara Tito de Jesus Filipe.
Atividade ne’e realiza husi AJTL no apoiu husi UNDP, KOICA no governu Korea no koopera ho Konsellu Imprensa.
Orador ba edisaun daruak mak Prezidente Konsellu Imprensa (CI), Virgílio da Silva Guterres, Diretor Informasaun GMN-TV, Francedes Suni no Koordenador Informasaun RTTL.EP, João Guterres.
