Reportazen Zevonia Vieira
Membru parlamentu sira realiza eleisaun hodi hili Prezidente Parlamentu Nasional (PPN) foun. Liu hosi eleisaun ne’ebe mak akontese no organiza direita hosi bankada PLP, FRETILIN no KHUNTO.
Liu hosi rezultadu eleisaun hatudu votus a-favor hamutuk 40, ne’ebe inklui votus 36 hosi bankada FRETILIN, PLP no KHNUTO, votus hosi Partdiu Demokratiku hatudu votus a-favor nain 4. Rezultadu hosi eleisaun refere Xefe Bankada FRETILIN, Aniceto Guterres eleitu nudar Prezidente Parlamentu tuir rezultadu votasaun.
Neon Metin halo konfirmasaun konaba lejitimidade iha ka lae? Ba Neon Metin Xefe Bankada FRETILIN ne’ebe eleitu nudar Prezidente Parlamentu hateten se kestiona konaba prosesu ne’e bele kestiona maibe nia rezultadu votus 44 tanba bankada seluk mos fo votus hotu.
Hosi eleisaun ne’e se mak truka Prezidente Parlamentu Arao Noe nia fatin? Ba Neon Metin Aniceto hateten, ohin Prezidente eleitu iha tiha ona, “konforme ba votus ne’ebe mak iha, hau mak eleitu sai Prezidente”.
Aniceto hateten iha Parlamentu ne’e maioria mak manda, Parlamentu labele hakruk ba minoria, “plenaria tuir mai hau mak sei lidera, iha kinta feira sei konvoka lideres bankadas”.
Iha parte sorin Prezidente Parlamentu Nasional (PPN) atual, Arao Noe ba jornalista sira hateten eleisaun meza do parlamentu ohin nian la hetan konnesementu, tanba la iha ajenda ne’ebe aprovadu hosi lideres bankadas para hodi halo plenaria.
“Hau nia despashu fo sai katak ohin la iha plenaria tanba laiha ajenda, agora ajenda ne’ebe iha ne’e, Vice nain rua mak lori ba tau bai ha meja no ami la hatene saida mak akontese. Konaba votasaun ami la hatane tanba la anunsia sai, kandidatu mos laiha, kontajen votus mos laiha prezensa tekniku sira hosi parlamentu nasional”, hateten Arao Noe, 19/05.
Arao hatutan Eleisaun ida ohin bele dehan katak sem ema ida hatene, laiha akta, nia rezultadu intrega ba se no kontazen lori ba tau iha ne’ebe la hatene.
Neon Metin konfirma ho PPN Arao Noe signifika eleisaun refere laiha lejitimidade? Ba Neon Metin Arao Noe hatan tuir rejimentu laiha lejitmidade konaba prosesu eleisaun ne’ebe akontese ona, maioria sim maibe tenke tuir prosesu legal.
“Hau sei rekore ba tribunal hodi buka lia los, se prosesu ne’e legal entaun hau sei kumpri”, deklara Arao.
