Reportazen Raimundu Seguerau
Ekipamentu mediku no aimoruk sira ne’ebe mak hola hosi UNDP, reprezenta governu Timor-Leste, hodi responde ba situasaun moras surtu Covid-19 to’o ona iha Timor-Leste.
Ba faze dahuluk nian ne’ebe mak to’o ona mak hanesan aimoruk sira ne’ebe mak presiza iha situasaun moras surtu Covid-19, hola iha Xina no Europa (Italia, Alemanha, Belgia) no rai seluktan.
Ministru Negosi Estranjeiru no Kooperasaun (MNEK), Deonisio Babo Soares ba jornalista sira hateten ekipamentu no aimoruk sira ohin entrega ba governu, tanba Ajensia ONU UNDP serbisu hamutuk ho governu Timor-Leste hodi kompras ekipamentus mediku, hodi nune’e professional saude sira uza hodi halo tratamentu
“Ita sente konfortavel oituan ona, se moras ne’e akontese, ita iha ona aimoruk ne’ebé mak preparadu atu bele halo atendementu sira, pesoal saude sira bele uza halo tratamentu”, dehan Babo iha Aero oportu Internasional Nicolau Lobato Comoro – Dili 28/05.
Nia haktuir, karik pandemia Covid-19 ne’e kona ona sidadaun sira, aimoruk ne’e bele uza hodi kura tanba nia kualidade aseguradu tebtebes no hetan rekoñesidu husi mundu internasionál tan ne’e, bele uza halo atendementu.
Iha parte sorin Reprezentante UNDP iha Timor-Leste, Tuya Altangerel hateten kontente tebes tanba bele entrega ekipamentus ba governu Timor-Leste, ne’ebe UNDP sosa hosi manufaktur iha Xina no Europa
“UNDP servisu hamutuk ho SAMES, Laboratoriu Nasional no Departementu Farmasia husi Ministeriu Saude, iha prosesu aprovizionamentu hodi asegura katak produtu no ekipamentus mediku ne’ebé UNDP sosa ho kualidade ne’ebé di’ak”, Tuya relata.
Tuya hatutan durante mosu pandemia Covid-19 iha mundu, ekipamentus no aimoruk sira ninia fluktuasaun aas iha merkadu, maibé ho esforsu UNDP ninia ne’ebe servisu makaas konsege asegura rekerementu husi governu Timor-Leste ba UNDP liu-liu fornese produtus no ekipamentus mediku esensial sira.
Iha loron 1 Abril 2020, UNDP no governu Timor-Leste halao serbisu ida ne’ebe emerjensia, hodi sosa aimoruk sira no ekipamentu mediku nian bai ha moras Covid-19 no moras kritiku sira seluk.
