Reportazen David da Costa Gusmao*
Assosiasaun Estudante Munisipiu Ainaro (ASEMA) kolabora ho Ekipa Serbisu Covalima Vitoria ho Domin-20 EKSES-COVID-19, hodi halo solidariedade fahe informasaun ba publiku ho nesesidade bázika no husu apoiu Solidariedade husi dalan ninin, instituisaun no univesitariu sira.
Prezidente Ezekutiva ASEMA, Hermina da Costa Silva ba jornalista sira hateten ASEMA nu’udar asosiasaun estudante ne’ebe asosia estudante Munisipiu Ainaro nian ho nia moto mak “aprende hodi hatene, hatene ho liberta”, haree surtu COVID-19 atualmente fó ameasa boot ba mundu tomak, inklui ita nia rai, tanba ne’e ita nia estadu politikamente liu husi Dekretu do Prezidente da Republika Nú. 15/2021 1 de Marsu dekreta EE ba dala-11, hodi prevene transmisaun virus iha Timor-Leste.
Nia haktuir ho dezisaun ida ne’e estadu restrinji tiha atividade barak inklui atividade ekonomia iha Covalima ne’ebe prejudika ba rendimentu familiar nian, bainhira laiha ona rendimentu familiar, automatikamente susar atu asesu ba nesesidase primaria sira, ida ne’e problema boot, ho ida ne’e mak ASEMA hakarak fo solidaridade ba komunidade sira iha Covalima liu husi halo kolaborasaun ho EKSES.
“Hakarak fahe informasaun ba publiku ho Nesesidade bázika sira ne’ebe komunidade afetadu sira enfrenta, no akumula apoiu solidariedade husi parte hotu-hotu iha Dili laran kona-ba nesesidade bázika sira”, nia esplika.
Nia subliña hahu ohin loron 5 Marsu sei lao iha dalan ninin no prekore iha univesidade no instituisaun sira iha Dili laran ho kaisa solidariedade nian, hodi husu apoiu finanseiru, nune’e mos apoiu solidaridade hotu- sei akomoda iha posko sede RENTIL-Farol.
