Reportazen David da Costa Gusmao*
Numeru konfirmadu COVID-19 ne’ebe kontinua sae kada loron iha liu-liu Dili laran, no governu foti desizaun hodi halo serka sanitaria ka konfinamentu obrigatoriu, fo impaktu ba estudante sira ne’ebe mai halo estudu iha kapital Dili, tanba sira aluga fatin (kost), hahu menus hahan ba sira.
Situasuan ne’e fanun negosiaten timoroan balun, ne’ebe mak iha konsiensia, hodi halo asaun soliedaridade fahe fos ba estudante hamutuk nain 200 ne’ebe aluga hela fatin, hodi tulun netik iha situasaun estadu emerjensia ne’e.
Negosiante timoroan, Fernando Amaral hateten objetivu fahe foos ne’e, haree ba situasaun estadu taka dalan hotu ona no ema labele ba munisipiu, nune’e mos sira iha munisipiu labele mai iha Dili , entaun ho ida ne’e haree estudante sira iha kost iha Dili laran sira balun laiha ona foos.
“Hau haree iha media sosial Facebook no WhatsApp alin sira kost iha Dili ne’e, balun halerik los ona ba hahan atu han, balun dehan laiha ona fos atu tein, ho ida ne’e mak hau iha inisiativa hodi foti desizaun katak hau bele fahe netik foos uituan-uituan ba alin sira ne’e, hodi sira bele tein atu han”, explika Fernando ba jornalista neon metin liu husi via whatsApp iha nia hela fatin Surikmas, 18/03.
Nia dehan fahe foos sira ne’e para alin sira halo netik sasoro atu sata netik ba sira nia kabun hodi hein Esatadu Emerjensia ne’e to’o remata.
“Hau rasik ho ferikoan mak foti inisitavia ne’e hodi fahe foos ne’e, ami hola uluk fos 15 sakas no mai tau hamutuk 5 sakas iha uma, depois hau fahe informasaun liu husi facebook, katak alin sira iha kost se mak foos laiha liu ona, ami bele ajuda imi atu hetan netik foos, alin sira barak mai iha uma hodi simu foos,” esplika nia
Nia haktuir tan, deside tan hola tan foos 30 sakas hodi tau ba iha uma, hodi kontinua fahe ba alin sira ne’ebe mak seidauk hetan no foos saku ida fahe tia ba plastiku tolu depois fahe ba sira.
Nia salienta foos 30 sakas fahe ne’e mos la to’o nafatin, no maun rasik mos hakarak atu ajuda entaun nia ó foos saku 8, nune’e mos maun ida husi Viqueque, nia mos azuda foos saku 2, kontinua fahe ida ne’e maibe la to’o nafatin ba alin sira ne’e.
Nia informa katak foos hamutuk 90 sakas no fahe ba ema nain 200, tuir planu katak atu fahe deit ba estudante hosi Viqueque maibe, estudante sira hosi municipio seluk mos mai, tanba sira mos hasoru susar hanesan
Fernando rekomenda ba governu, governu tenke prepara foos hodi maneja tau iha plastik ida-ida, para fahe netik ba alin sira hodi bele sustenta netik ba iha situasaun serka sanitaria.
*(David da Costa Gusmao nudar estudante UNTL ne’ebe halo estajiu iha Neon Metin)
