Reportazen Zevonia Vieira
Ekipa vijilansia COVID-19 ohin loron deteta tan kazu foun konfirmad COVID-19 nain 9, (Dili nain 4, Viqueque nain 4, Lautem nain 1) liu hosi zoom press conference loron 22/03, Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo informa katak evolusaun surtu COVID-19 iha municipio Dili hetan kazu foun nain 4, ho detalles hanesan tuir mai katak kazu pozitivu 1, hela iha Aninfuik, Suku Campo Alor, Posto Administrativu Dom Aleixo, pozitivu ida ne’e detetatu iha teste atu hetan autorizasaun esepsionál sai husi serka sanitaria Dili, ba Covalima, kazu ida ne’e, estudante UNPAZ, Fakuldade Direto, hahú iha sintomas iha loron 18 Marsu 2021.
Kazu pozitivu 2, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu hirak ne’e kontaktu-besik ho kazu iha cluster hanesan, ne’ebé anunsía horiseik, 20 Marsu. Kazu pozitivu 1, hela iha Aldeia 20 de Setembro, Suku Bebonuk, Postu Administrativu Dom Aleixo, pozitivu ida ne’e kontaktu-besik ho kazu iha cluster hanesan.
Ho nune’e kazu detetadu ka pozitivu iha Munisipiu Dili husi loron 7 Marsu 2021, to’o 22 Marsu 2021, hamutuk 183.
Iha municipio Lautem, ohin deteta kazu foun nain 1, kazu ida ne’e halo viajen husi Dili ba Lautem iha dia 18 Marsu 2021. Kazu pozitivu ne’e estudante UNITAL, iha Lautem hela iha Aldeia Reisoru, Suku Home, Lospalos Vila, iha Dili hela iha Aldeia Bedois, Suku Camea.
Iha Viqueque deteta kazu nain 4, hamutuk hotu Munisipiu Viqueque deteta ona kazu konfirmadu nain 8. Kazu foun hirak ne’e, hela iha Aldeia Mamaluk (Beloi), Suku Karaubalu, Viqueque. Kazu konfirmadu hirak ne’e kontaktu-besik ho profisionál saúde ne’ebé halo kursu pós-laboral iha UNTL & fila husi Dili ba Viqueque iha loron 8 Marsu.
Dadus jeral ba ohin loron 22 Marsu deteta kazu foun nain 9, kazu rekuperadu nain 4, kazu ativu hamutuk 211. Kazu nain 9 ohin, iha mane nain 2, feto nain 7, ema ho idade tinan 8-11 nain 2, ema ho idade entre tinan 19-42 nain 7, ema sintomátiku nain 1, Eema asintomátiku nain 8.
Hosi horiseik mai ohin hamutuk hotu halo 656 testes PCR. Husi loron 19/3/2021 to’o 22/3/2021, teste PCR ba ema atu hetan autorizasaun esepsionál atu sai husi serka sanitária husi Munisipiu Dili hamutuk 420.
