Reportazen Zevonia Vieira
Ministeriu Saude (MS) deteta tan kazu konfirmadu foun COVID-19 loron 23 Abril hamutuk 82. Liu hosi komunikadu imprensa Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo relata ba jornalista sira katak ohin deteta kazu konfirmadu foun hamutuk 82 (iha Dili 72, municipio seluk nain 10).
Hosi total kazu detetadu foun ohin mane 50, feto 32, husi total kazu detetadu foun ohin asintomátiku 72 (87,8%), sintomátiku 10. Husi total kazu detetadu foun ohin, 51 (62,1%) maka deteta tamba halo teste ho razaun atu halo viajen/ka halo ona viajen ba Munispiu hafoin deteta pozitivu. Maski nune’e, sira ne’ebé rezultadu teste pozitivu husi grupu ida ne’e, maioria sira nia hela fatin, iha duni cluster sira ne’ebé iha kazu detetadu barak iha Munisipiu Dili.
Kazu rekuperadu hamutuk 19, total kazu ativu ohin 925. Husi horiseik mai ohin, ema hamutuk 950 halo teste PCR, ho detalles hanesan vijilánsia sentinela 44, rastreiu ba kontaktu (Contact tracing) nain 100. Rastreiu Aleatoriu (Random Screening) 245 no viajen sai husi serka sanitária Munisipiu Dili nain 481 no viajen internasionál nain 31.
