Reportajen David da Costa Gusmao
Juventude FRETILIN, husu ba Ministru Turizmu Komérsiu no Indústria Dr. Jose Lucas da Silva hanesan Prezidente Autoridade Nasionál Expo Dubai 2020, atu esplika didi’ak benefísiu mak Timor-Leste hetan husi expo ne’e.
“Ami hakarak husu ba MTCI atu esplika, kona ba benefísiu saida mak Timor-Leste hakarak hetan husi Expo Dubai 2020 ne’e, no nia impaktu Ekonomia no Sosiál iha tempu badak no ba tempu naruk ni’an ho nia progresu no rezultadu,” dehan Porta voz Juventude Fretilín, Jeferino liu husi konferénsia imprensa iha sede Komité Central da Fretilín Comoro, Segunda 14/06.
Nia haktuir Juventude Fretilín, husu mós Komisaun D Parlamentu Nasionál no Bankadas Parlamentares atu debate urjénsia ho Ministru Koordenadór Asuntu Ekonómiku S.E Eng . Joaquim Amaral no S.E Dr. Jose Lucas da Silva hanesan Ministru Turizmu Komérsiu Indústria nu’udar mós Prezidente Autoridade Nasionál ba Expo Dubai iha tempu badak.
“Ami Juventude Fretilín kontinua fó konfiansa tomak ba Primeiru Ministru VIII Governu Konstitusional Jenerál Taur Matan Ruak, maibé Juventude Fretilín mos rejeita nafatin Programa Expo Dubai 2020,” nia dehan.
