Reportajen David da Costa Gusmao
Ministériu Saude (MS) liu husi Sala Situasaun Centru Integradu Jestaun Krize (SS-CIJK), ohin regista kazu detetadu foun iha oras 24 ikus hamutuk 148, Munisipiu Ermera 123, Dili 18 no munisipiu seluk hamutuk 7, kazu ativu ne’ebe mak baixa iha izolamentu hamutuk 736 no kazu rekuperadu ba ohin loron hamutuk 66.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo dehan kazu detetatu foun neebé relata loron 28 Jullu tinan ne’e hamutuk 148, iha Dili 18, Ermera hamutuk 123, no iha munisipiu seluk hamutuk nain 7.
“Husi total kazu detetadu foun ohin ne’e Dili 18, Ermera 123, Ainaro 1, Baucau 2, Covalima 1, no Manufahi nain 3, kazu foun ne’e mane hamutuk 68 no feto hamutuk 80. kazu detetadu foun ohin ne’e, hirak ho idade tinan<12:3; ho idade entre tinan 12-59 nain 142 (96%); ho idade >60:6, no kazu detetadu foun ohin 49 kazus ka 33,1% maka sintomátiku (hatudu sintomas),” Dr. Rui splika liu hosi komunikadu imprensa ne’ebe Neon Metin asesu iha loron, Kuarta 28/07.
Nune’e mos kazu rekuperadu ne’ebé ralata ohin loron 28 de Jullu tinan ne’e hamutuk 66. Kazu ativu ne’eba mak ohin loron baixa hela iha izolamentu hamutuk 736 no total kazu konfirmandu kumulativu ne’ebe mak sura husi 21 Marsu 2020 to’o mai iha ohin loron 28 Jullu tinan ne’e hamutuk ema nain 10.535.
Nia dehan, hosi horiseik mai ohin loron 16 Jullu tinan ne’e, Laboratóriu Nasionál Saúde halo testes Polymerase Chain Reaction (PCR) hamutuk ema nain 961 iha Dili no horseik iha munisipiu sira seluk, REAOA ho HNGV halo teste PCR ba ema hamutuk 276.
Nia haktuir tan, evolusaun surtu covid-19 iha Munisipiu Ermera durante semana ida ikus nia laran, numeru kazu pozitivu hahú aumenta makaas iha loron 24 Jullu 2021, wainhira relata 36 kazus iha loron ida deit.
“Ekipa saúde halo rastreiu kontaktu (contact tracing) hahú iha 26 Jullu, deteta kazu kazu pozitivu 18 ne’ebé relata iha dia 27 Jullu no ohin relata kazu pozitivu hamutuk 123. Ekipa saúde serbisu hamutuk ho autoridade administrativa no autoridade komunitária sira, nafatin halo rastreiu kontaktu”, dehan Dr. Rui
Nia salienta, husi kazu pozitivu sintomátiku ne’ebé relata ohin, 48 ka 98% iha Munisipiu Ermera no Munisipiu Ermera ninia kobertura vasina, to o ohin dader tuku 10h00: 12,4% deit ba primeira doze no segunda doze 1,39% deit. Kobertura ida ne’e, maka ki’ik-liu ona entre munisipiu sira hotu iha Timor-Leste nia laran tomak.
Total doze vasina ne’ebé fó ona ba populasaun elijível (tinan 18 ba leten), to’o ohin dader 10H00, dia 21 de Jullu tinan ne’e , tuir Sistema Informasaun Sáude iha Ministériu Saúde, iha Dili total no pursentu akumulativu primero dozes hamutuk 133.016 (62,2%), no segundu dozes hamutuk 75.889(35,50%). Iha Timor-Leste laran tomak ne’ebe mak simu ona primero dozes hamutuk 277.953 (36,8%) no segundo dozes hamutuk 98.286(11,83%).
