Reportajen Francisco JDA
Relasiona ho planu partidu Kmanek Haburas Unidade Nasionál Timor Oan (KHUNTO) katak sei realiza juramentu iha foho Ramelau, iha loron 14 Agusto, ne’e sai hanesan kompromisu polítika partidu KHUNTO nian ba povu, atu garante responsabilidade ba nasaun ho justu.
Vise Prezidente Parlamentu Nasional (PPN) no nu’udar Deputadu Bankada KHUNTO, Luis Robertu liu hosi vila telefone informa katak, bazeia ba informasaun ne’ebé espalla iha públiku katak membru governu hosi KHUNTO, sei la bá tuir juramentu ne’e la los, tanba ida ne’e kompromisu partidu KHUNTO nian hotu-hotu tenke ba tuir.
“Ami nia kompromisu iha kampaña polítika katak bainhira KHUNTO hetan asentu parlamentár ou iha governu laran mak membro governu no deputadu sei ba tuir juramentu iha Ramelau, no bainhira ami halo tinan 10 ba ami nia partidu iha Manleu ,ami nia superior másimu ko’alia katak membru Governu hotu sei ba juramemtu iha Ramelau iha loron 14 Agostu, maibé tuir informasaun balun membru governu balun lakohi tuir juramentu, ida ne’e ha’u fiar katak ne’e la los tanba,” hatete Vise Presidente PPN Luis Robertu via Telefone.
Luis Robertu realsa tan, daudaun ne’e estrutura partidu KHUNTO, Deputadu no membru governu sira preparadu ona atu ba Ramelau hodi halo juramentu.
Nia dehan maski ho situasaun Covid-19, no munisípiu balun aplika Serka Sanitaria maibé tanba Munisípiu Ainaro la aplika, nune’e ne’e espasu di’ak para atu ba halo juramentu maibé kontinua kumpre regra saúde mundiál no OMS nian.
