Home Notisia Feira Siensia iha UNTL, Buka Solusaun ba Dezenvolvimentu Sustentável

Feira Siensia iha UNTL, Buka Solusaun ba Dezenvolvimentu Sustentável

151
0
Lixu namkari besik fatin soe lixu (Foto: GMN)

Reportajen Adroaldo ‘Saretukau”

Feira Siensia ba dahuluk nian foka ba asuntu lixu no dezenvolvimentu sustentável. Feira ne’e sai ona espasu ba truka ideas sientifiku entre estudantes sira.

Diretora Sentru Laboratóriu Sidadania UNTL, Maria José Barbosa, hanesan Kordenadora máxima ne’ebé responsável ba feira ne’e hateten katak feira ne’e kria espasu ba fahe ideas hodi dezenvolve siensia no hanoin sira kona ba dezenvolvimentu sustentável.

“Feira ida ne’e hanesan projetu laboratóriu sidadania, ne’ebé iha objetivu prinsipal, kria redes de kontaktu, permite ema sira simu malu, kria ideia no fatin partilla ba estudante. No sé posível entre hirak ne’e kria solusaun sira, nune’e hotu-hotu konsiente ba problema saída no solusaun saída, hotu tiha ida ne’e hotu-hotu bele kolabora hamtuk, atu nune’e solusaun bele la’o ho di’ak, esensiál liu ba ida ne’e’, Maria Jose hatete.

Maria Jose mos dehan katak lixu mak problema atual ida ne’ebe estudante siensia sira fo atensaun.

“Akadémika sira mak futuru profisional, enkuantu profisional, profesor sira, enjiñeiru, diretor sira, labele kontinua kontribui atu permiti problema lixu ne’e kontinua. Tanba sira mak sai hanesan ajente sosial ne’ebé boot. Ho ida ne’e ha’u lori problema ida ne’e hanesan problema ne’ebé aseitadu. Tanba problema ne’ebé boot no presiza ajir ho lalais”, Maria Jose aumenta tan.

Feira siénsia ida ne’e rejulta projetu ida hosi fakuldade, mak Fakuldade ualu ne’ebé mai lori sira nia projetu, Fakuldade sira hetan kolaborasaun hosi sira nia estudante. Hosi ida ne’e, ideia feira de siénsia ida ne’e mak espasu ida atu fahe, debate, simpóziu no kahur ho arte, sinema no buat barak, ne’ebé iha europeiu bai-bain ema hanaran feira de siénsia, tanba fatin ida, iha ne’ebé fatin atu partilla siénsia, polítika, soseidade sivil, altu figura estadu sira.

Aprezentadora ba Feira ne’e, Sherley Siki hosi Revista Edukasional Lafaek, CARE Internasional observa katak fenomenu soe fo’er ba iha lixu fatin, ita hotu agora haree da-daun, iha ita nia bairu-bairu sira, imi haree ema soe lixu, iha ne’ebá ema tau lixu fatin, maibé soe fali iha li’ur, ne’e ita senti oinsá, ami la’os espertu iha ambiente, maibé ami koko hodi bele komunika ba ita, kolega sira, hodi senti to’ok situasaun ida ne’e.

“Ita nia lixu iha tasi da-daun ne’e hamutuk 20% no 80% iha rai maran, ne’e signifika katak ita nia lixu ne’ebé ita iha ne’e, hotu-hotu halai ba tasi. Maioria lixu sira ne’e mai hosi nasaun boot sira Índia, Indonézia, Xina ne’ebé prodús lixu boot teb-tebes. Kuaze ita prodús lixu 80 biliaun kada tinan no lixu sira ne’e halai ba oseanu pasífiku, hamate balada sira iha tasi laran”, Sherley haktuir.

Sherley mos observa katak fin de semana liuba, joven sira dansa hela iha Kristu Rei, lixu sira naklekar hela iha sira nia okos, sira lasibuk. Iha bairo Pite, iha mos Motael, imi sira ne’ebé gosta ba tur iha ne’ebá. Iha Tasi Tolu, bai-bain manu tasi sira mai, iha Bidau Santana, iha Suric Mas, areia Branka, ne’e ita haree ho matan.

Parstisipante ida, hanesan mós Prezidente ba Asosiasaun Jerasaun Hadomi Natureza (JERHANA) Antoninho dos Santos de Oliveira, iha nia intervista hateten katak nia interesadu los ho feira ne’e hakarak atu motiva nafatin joven sira hodi hadomi meioambiente.

“Buat ne’ebé mak interesante tebes maka ita haree hosi orador Timor Oan rasik no mesak otas nurak, joven Timor Oan de’it ne’ebé ke brani aprejenta matéria ruma ne’ebé atu mentaliza Timor Oan tomak oinsá bele Care ba sira nia natureza, care ba ambiente, hodi oinsá bele tau matan ba lixu sira ne’ebé ke ohin loron sai hanesan problema ambiente ba Timor”, Antoninho expressa.

Nia degan mos katak, “Ami mós sai ativista ba ambiente hotu iha aktividade lor-loron nian, ita haree ba problema lixu ne’ebé hanesan sira aprezenta ohin, ne’e problema global, la’os Timor d’eit. Maibé Timor ne’e oinsá mak ita bele responde ba buat ne’e, mezmu ke lei ne’e bele kria rigoroju, iha lei baze ambiental, maibé ita la iha aksaun urjenti ida ba transformasaun mentalidade, karakte, oinsá bele hamosu sensibilizasaun komunidade nian hodi haree ba problema lixu entaun ita sei labele rezolve buat ida.”

Feira ne’e rasik abertutra hosi Magnífiku Reitor UNTL, iha kampus sentral UNTL nian. Feira ne’e sei hala’o durante loron haat. Hahú loron 18 no sei remata iha kinta feira loron 21 iha Fulan Fevereiru, iha espasu Kampus Sentral UNTL.

Feira refere hetan partisipasaun hosi Pro-Reitres, Diretores Jeral, Dekanu no Vise Dekanu, Direotres Departamentu no estudante hosi Fakuldade sira iha UNTL nian. No iha oradores hosi fatin oi-oin ho sira nia área espesífiku la hanesan hodi mai fahe hamutuk ho estudante no partispante sira hotu.

Iha feira ne’e mos iha espozisaun konabá Poezia konabá ambiente, aprezentasaun Múzika, halo Poezia no sel-seluk tan.

 

LEAVE A REPLY

Please enter your comment!
Please enter your name here