Home Notisia Aniversariu RENETIL 31: Povo Seidauk Siente Loloos Benefisiu Hosi Ukun Rasik An

Aniversariu RENETIL 31: Povo Seidauk Siente Loloos Benefisiu Hosi Ukun Rasik An

114
0
(Foto: tafara.tl)

Reportajen: Nogueira M. “Haksolok” & Cornelio  “Lakole” S. V. 

Selebra aniversariu RENETIL ba dala 31 no referendum ba dala 20, Vice Sekretariu Jeral (SekJer) dehan povo seidauk sentre loloos benefisiu hosi ukun rasik an. Lia hirak ne’e Vice Sekjer hato’o iha iha kalan selebrasaun tinan RENETIL nian iha Sede Renetil, Farol, 20/06.  Tema ba selebrasaun aniversariu RENETIL ba tinan ida ne’e maka “Konstrusaun no Rekontrusaun Sosiedade Timor-Leste Hafoin Tinan 20 Referendun”.

Vise Sekretariu Jéral atual “Resistensia Entudante Nasional Timor-Leste RENETIL”, Francisco JMF “Lires” Belo,  iha nia dikursu hateten, “Luta ba libertasaun patria ita liu tiha ona, agora ita luta makas liu tan ba povu nia moris. Luta ba libertasaun povu ita luta hela maibe ita nia povu sedauk sente loloos benefisiu husi ukun rasik an ida ne’e.” Nia haktuir liu tan katak selebrasaun aniversaiu ba tinan ida ne’e nia sente haksolok tebes tanba membru sira mai partispa masimu, diferensia ho tinan hirak liu ba, no nia husu membru RENETIL  atu tau importansia ba loron istoriku ida ne’e.

Lires mos husu ba membru RENETIL hotu atu  halo refleksaun,  saida mak ita halo ona no saida mak ita agora hanoin atu halo  no tanbasa mak iha tempu ida agora ne’e ita sedauk halo politika.

“Ho nune’e ba militante ida-idak iha kalan ida ne’e ita hotu-hotu halo refleksaun ba ida-idak nia an. Frakeza ne’ebé iha ita ida-idak nia an no mós frakeza ne’ebe ita nia ogsnizasaun iha. Liu husi frakeza hirak ne’e, oinsa mak ita hotu tau hanoin lixuk para hadia atu nune’e ita bele fó ita nia kontribuisaun ba ita nia  organizasaun no nasaun ba oin, “ Lires hato’o.

Lires mos dehan katak programa tinan ida ne’e mak oinsa halo preparasaun no kaderizasaun politka ba ita nia jerasaun foun sira. Lires optimis katak iha sira  nia mandatu agora sira  sei halo sira  nia knaar tuir mandatu ne’ebé fó ba sira  hodi responde ba  resolusaun kongresu ne’ebé ita hotu  deside hamutuk.

Reitor UNPAZ, nudar mos Fundador RENETIL, Luca “Rama Metan” da Costa hato’o iha nia reflesaun hodi husu ba militante sira atu nafatin luta ba libertasaun povu ida ne’e.

Vice Presidente Conselho Central RENETIL, Vergilio Guteres “lamukan” husu atu RENETIL kontinua luta hasoru diskriminasaun oin-oin mak mosu iha sosiedade nia let.

“Oinsa RENETIL nafatin resiste ba injustisa sosial, kontra oportunismu, tanba uluk ita luta ba libertasaun patria ita mós resiste buat sira hanesan oportunista, injustisa, divisionismu, regionalismu, no rasismu. Tan ne’e mós agora buat sira ne’e sai inimigu ba dezemvolvimentu nasional  no RENETIL hakarak ka lakoi tenki hatudu nia forsa ita tenke hasoru buat sira ne’e,” Lamukan hateten.

Selebrasaun tinan ida ne’e, RENETIL organiza misa iha Igreja Motael ho Amu selebrante kompañeru Juvito  ho kompaneiru Martinho Gusmao. Halo visita mos ba Fundador RENETIL, Fernando Lasama nia rate, no mos organiza reflesaun hamutuk iha tempu kalan. Numeru partisipante ba selebrasaun tinan ida ne’e aumenta, bainhira kompara ho tinan ida liuba.

 

LEAVE A REPLY

Please enter your comment!
Please enter your name here