Home Notisia Autoridade Hapara Projetu Distribuisaun Liña Eletrisidade, KEFA: Povu Presiza Ahi

Autoridade Hapara Projetu Distribuisaun Liña Eletrisidade, KEFA: Povu Presiza Ahi

557
0
Klibur Estudante Faturbeliu [KEFA] halo konferensia da imprensa hodi protesta konaba autoridade lokal hapara lina eletrisidade iha Faturberliu. [Foto: Santina Lucia Da Costa | 01.10.2019]

“Uma kain hamutuk 180, durante okupasaun Indonesia to’o ohin loron Timor-Leste hetan nia independensia, seidauk asesu ba elektrisidade tanba ne’e povu presiza ahi no povu hakarak sente ukun rasik aan ida ne’e”. KEFA

Relasiona ho problema ne’ebe akontese iha Municipio Manufahi konaba Administrador Manufahi ho polisia hapara projetu instalasaun liña elektrisidade ba komuniha sira iha eis-transmigrasaun SP 1-2 iha suku klakuk, Klibur Estudante Faturbeliu [KEFA], hatoo deklarasaun ba publiku liu konferensia imprensa.

Portavos Rumao Piedade Mendoça deklara katak informasaun ne’ebe akumula hamutuk nain ba kompania Dulur Maluk Unip.Lda, atual Xefe Suku Klakuk, iha vontade atu fornese liña elektrisidade ba komunidade sira, maske la liu husi tenderizasaun, asaun ida ne’e hanesan manifestu solidariedade ba komunidade sira, tanba tinan naruk ona la asesu ba liña elektrisidade.” Dehan porta-voz Rumão Piedade Mendonça.

Rumao hatutan tis Transmigrasi SP 1-2 iha potensia rekursu naturais ne’ebé bo’ot tebes hanesan lagoa madomahut, hanesan estratejia ba turismu komunitaria, atu nune’e bele atrai munisipiu Manufahi, iha mós produtu lokal ne’ebé barak tebes hanesan Hudi, Aifarina, Batar, Haree no seluk tan, tanba ne’e estadu no autoridade lokal sira presija kria kondisaun baziku hanesan estrada, eletrisidade, bee moos no saniamentu baziku.

“Ami lamenta ho hahalok husi autoridade munisipiu Manufahi ho ekipa hodi hapara projetu distribuisaun linã elektrisidade ba komunidade iha Eis-Transmigrasi Sp 1-2, ho total uma kain hamutuk 180, durante okupasaun Indonesia to’o ohin loron Timor-Leste hetan nia independensia, seidauk asesu ba elektrisidade tanba ne’e povu presija ahi no povu hakarak sente ukun rasik aan ida ne’e, liu husi planu governu nian katak sei instala elektrisidade iha teritoriu timor laran tomak”, tenik Rumão, 01/10, iha UNTL Kaikoli

Rumão mos hateten katak durante ne’e komunidade voluntariamente oferese nia plantasaun hanesan Ai-teka, Has no Nú ba kompaña tesi ho objetivu ida atu dada liña elektrisidade ba komunidade, maibé depois estraga tiha ai-horis hirak, hetan fali inpedementu husi autóridade lokál sira ho razaun katak projeitu illegal, povu kontinua sofre ba bei-beik husi desizaun nai-ulun sira nian.

Ho razaun refere, KEFA hatoo ezijensia ba administrador Municipio Manufahi, hodi halo dialogu ho komunidade nomós kompañia Dulur Maluk unip.Lda, hodi buka solusaun di’ak no autoriza kompañia kontinua projetu distribui liña elektridade ba komunidade sira ne’ebé ohin loron paradu, tanba inpedimentu husi Administrador Munisipiu.

KEFA mos ezije ba administrador postu administrativu Fatuberliu, atu esklarese ba komunidade kona-ba objetivu hapara projeitu distribuisaun liña elektrisidade ba komunidade eis-transmigrasi SP 1-2.

Liu hosi konferensi imprensa, estudante sira mos hosu ba kompañia Dulur Maluk Lda, atu bele kontinua projeitu ne’e ho responsabilidade, to’o finaliza liña elektrisidade ba komunidade sira, tanba tinan naruk ona komunidade sira la asesu ba elektrisidade. Ba Ministeriu Obras Públiku atu bele haree no foti medidas, hodi rezolve problema refere, tanba komunidade presija asesu ba elektrisidade.

“Se kontinuasaun laiha, maka ami sei hamutuk ho komunidade sira ezije ba kompañia ne’ebé estraga ona ai-horis hanesan Nú, Haas, no Ai-teka ne’ebé tesi husi kompañia sei multa ka selu ba komunidade ne’ebé efetadu husi obra refere”, tenik Porta-voz

Iha oportunidade ida ne’e, KEFA mos hato ezijensia ba Ministeriu Obras Publikas, Administrador Munisipiu Manufahi no Postu Administrativu Fatuberliu, hodi hapara mós projetu ponte tolu, ne’ebé liga suku Klakuk ba Fatukahi, tanba projetu ne’e tama ba pakote emerjensia, responsavel husi kompañia rai Suar no Mukun Brather projetu lao kleur ona, maibé to’o agora seidauk finaliza, difikulta tebes movimentu komunidade no estudante sira wainhira iha tempu udan. * [ Santina Lucia Da Costa | Editor: Zevonia Vieira | Neon Metin | 01.10.2019]

 

 

LEAVE A REPLY

Please enter your comment!
Please enter your name here