Home Notisia Pe. Herminio: 12 Novembru Inspiradu hosi 12 Outubru Papa João Paulo II...

Pe. Herminio: 12 Novembru Inspiradu hosi 12 Outubru Papa João Paulo II Nia Vizita

215
0
Pe. Herminio de Fatima Goncalves

Reportajen Santina Lucia da Costa

Ohin, Timor-Leste bele hanoin hikas ba kotuk, tinan 30 liuba, vizita Papa João Paulo II nian. Momentu inisiu hosi resuresaun juventude nian. Prezidente Komisaun Nasional Justisa no Paz Pe. Herminio de Fatima Goncalves hateten katak, prezensa Amu Papa João Paulo II nia lori roman mai Timor-leste. Liafuan ne’e nia hato’o iha momentu debate Timor-Leste Voice of the Voiceless, iha Salaun Katedral, Dili, ohin, 12/10.

“Amu papa nia vizita ne’e ema haree situasaun poltika dezenvolvimentu iha timor tempu ne’eba nian, politika ne’eba ne’e ema foti deit katak husi 12 Novembru nian mak hodi ba, mais ba hau 12 Novembru ne’e inspiradu husi 12 de Outubru, ne’ebé Santu Padre mai ne’e lori anin foun ida ba Timoroan sira iha tempu ida difisil. Iha tempu ida Timoroan sira dezesperadu, la hetan roman ba sira nia moris, iha presaun nia laran, mate, ema kaer kastigu barak. Amu Papa fó esperansa atu aten brani hasoru situasaun ida ne’e, no situasaun ida ne’e mós nakloke ba mundu problema timor nian,” hateten Pe. Herminio de Fatima Goncalves, hafoin partisipa debate Timor-Leste Voice of the voiceless.

“Momentu Amu Papa seidauk mai vizita Timor ne’e, timor ne’e iha nakukun laran, ema nasaun seluk la hatene timor. Nune’e mós nasaun viziñus Indonesia sira la hatene timor nia problema oinsa los,” Pe. Herminio de Fatima Goncalves esplika liutan.

Amo Herminio mos expresa katak fatin Tasi-Tolu uluk amu papa mai vizita no halo misa ne’eba, oras ne’e dadaun governu abandona, no husu ba governu se konsidera hanesan fatin serimonial istória Timor nian, governu iha dever atu hadia.

“Fatin iha Tasi-Tolu ita nia governu sira abandona. Ba hau fatin ne’eba ne’e uluk kontribui husi governu tempu Indonesia ne’ebé señor Mario Carascalão nu’udar governadór. Se governu konsidera  hanesan fatin serimonial nian ida ba istória timor nian ida, hau hanoin governu iha dever ida atu bele hadia didi’ak atu atrai turizmu sira,” nia hatutan.

Partisipante demonstrasaun 12 Outubru 1989 nian ida mak lakohi identifika-an hatete katak oras ne’e dadaun estadu haluha tiha momentu importante ida iha Tasi-Tolu tinan 30  liuba.

“Governo haluha los ona eventu tinan 30 liuba nian ne’e. Eventu ida ne’e mak momentu ida luta libertasaun mosu hikas iha publik,” Fontes ne’e hatete.

 

 

 

LEAVE A REPLY

Please enter your comment!
Please enter your name here