Home Notisia Kona ba Bee Mos iha Baucau, UEUMB Kontra Deklarasaun Administrador Baucau Nian

Kona ba Bee Mos iha Baucau, UEUMB Kontra Deklarasaun Administrador Baucau Nian

72
0
Konferensia Imprensa UEUMB iha Kampus UNTL Kontra Deklarasaun Autoridade Munisipiu Baucau

Reportajen Adroaldo “Saretukau”

Uniaun Estudante Universitariu Munisípiu Baucau (UEUMB) halo Konferensia Imprensa ohin dader (16/10), hodi kontra deklarasaun Prezidente Autoridade Baucau, António Guterres, ne’ebe hatete katak 80% hosi populasaun asesu ona ba bee mos. Grupo estudante ne’e konsidera deklarasaun Presidente Autoridade Baucau nian ne’e hanesan atu halo kontente nia an deit tanba realidade la hanesan ho dadus mak Presidente Autoridade hato’o.

Loron hirak liuba notísia iha Ajénsia Tatoli mak ho títulu “Populasaun Baucau Maoria Asesu Bee Moos” ne’ebé públika iha loron 25 fulan setembru 2019 no Tempo Timor ho títulu “Populasaun Baucau 80% mak asesu ona Eletrisidade no Bee Moos”, publika iha loron 13 fulan setembru 2019. Maibe UEMB hatudu faktu seluk mak diferente ho saída mak Prezidente Autoridade deklara.

Peskija UEUMB nian ne’ebe publika iha deklarasaun imprensa ne’e hato’o katak Postu Administrativu Baucau Vila, área sira ne’ebé preokupa ba bee moos mak hanesan, Baucau Vila, Vila Nova no Gariuai. Iha fatin sira ne’e comunidade kontinua lalin masa no lori ho karosa ba kuru bee. Iha Venilale nia área rurais kontiua hasoru problema ho bee mos. Iha Postu Laga iha Aldeia 19 mak seidauk asesu ba bee mos, purezemplu iha Suku Sobagua, ema hotu seidauk asesu ba bee moos, inklui aldeia sira seluk ne’ebé hela iha área rural. Situasaun hanesan akontese mos iha Laisorulai, iha Quelekai no mos área rurais Vemasse nian.

“Ami mós hakarak hatete, sasukat haree komunidade asesu be moos la’os sura pursentu ka instalsaun kanu sira deit, maibé haree ba kondisaun atuál mak komunidade enfrenta. Presidente autoridade la haree hetan ida ne’e,” Porta Voz UEUMB Cesario Fernandes haktuir.

“Ami estudante munisípiu Baucau maioria hosi Postu Admnistrativu 6 ne’e hotu, ami rasik sente katak ida ne’e la refleta ba situasaun real ne’ebé ami hasoru no ami enfrenta,” Cesario akresenta liutan.

Porta Voz ne’e mos hatete katak ita ema moris presiza bee moos. Bee mos la iha buat hotu sei sai problema. Liga ho saúde nian, la iha ijiene ne’ebé di’ak, han buat ruma ho fo’er sei hetan moras nafatin. Bee moos ne’e importante ba ema vida umanu.

Konferensia Imprensa halao iha kampus UNTL oin no partisipa hosi membru UEUMB. UEUMB hanesan organizasaun universitáriu ne’ebé durante ne’e halibur univesitáriu Baucau oan tomak ne’ebé namkari no hala’o sira nia estudu iha universidade sira iha Timor laran tomak. UEUMB hanesan organizasaun ne’ebé ho nia vizaun no misaun hakarak hetan sosiedade Baucau ida ne’ebé prósperu, igual no hakmatek. Sai mós organizasaun ne’ebé iha kapasidade hodi debate bei-beik ba problema povu nian no oeferese ideia kreativu no konstrutivu ba estadu liu-liu munisípiu Baucau. Akumula ideia hosi intelektuais hodi fó suporta krítika no responsabilidade ba ajente estadu ne’ebé iha kompeténsia hodi foti desizaun. Distribui aspirasaun komunidade en jeral no espesifikante komunidade munisípiu Baucau ba entidade relevante ka governu atu atinje komundade ida ne’ebé prósperu.

LEAVE A REPLY

Please enter your comment!
Please enter your name here