Home EduTek Eskola EBC Iha Balibo Menus Manorin, Inan-Aman Fo Kontribuisaun Hodi Selu Manorin...

Eskola EBC Iha Balibo Menus Manorin, Inan-Aman Fo Kontribuisaun Hodi Selu Manorin Voluntariu

687
0
Diretor EBC Postu Administrativo Balibo, Gregoriu Kono. [Foto Santina Lucia da Costa | 19.10.2019]

Reportazen  Santina Lucia da Costa

Editor Zevonia Vieira 

Eskola laiha Biblioteka, estundantes la asesu bee moos, biblioteka no laboratorium la iha, susar ba estudante sira atu aprende tuir no hasae sira nia matenek

Edukasaun seitor importante iha nasaun demokratiku, edukasaun parte ida hodi prepara ema hodi partisipa iha dezenvolvimentu. Situasaun edukasaun iha Balibo sei sai preokupasaun boot ida, no presiza iha atensaun hosi governu.

Jornalista Neon Metin dadalia ho Diretor EBC Postu Administrativo Balibo, Gregoriu Kono, iha nia fatin servisu, nia hateten iha postu Administrativu Balibo, kompostu hosi EBC tolu hanesan EBS Balibo, Ebc Leo-Hitu no EBS Palaka, kada EBC iha agrupamentu, kada EBC kompostu mós husi filial, EBC Balibo iha filial 5, EBC Leo-Hitu iha filial 5 no EBC Palaka iha filial 5.

Problema ne’ebé mak sira iha maka menus professores, sira halo ona enkontru ho inan-aman sira, atu nune’e fó kontribuisaun osan, atu nune’e aumenta tan professores voluntario, responsabilidade 100% husi inan-aman.

“Inan-aman liu husi akordu enkontru jeral iha eskola, ho nune’e inan-aman sira mós prontu bele fó apoiu ba eskola ida ne’e, hodi prepara professor, atu nune’e ami nia oan sira bele hetan matenek ruma ba sira nia future”, hateten Gregoriu

Gregoriu konfesa katak durante ne’e sira esforsu hodi hatama proposta ba Ministeriu Edukasaun, hodi loke vaga ba profesores sira, maibe to’o agora sedauk iha rezultadu no laiha resposta hosi Ministeriu Edukasaun

Problema seluk ne’ebe sira hasoru maka eskola EBC Postu Balibo rasik, laiha edifisiu biblioteka no laboratóriu.

Problema seluk ne’ebe eskola iha Balibo hasoru maka estudante sira la asesu bee moos, eskola refere antes ne’e asesu ona bee moos, uza sira nia osan rasik, maibé komunidade sira la iha konsiensia, sira sobu hotu kanu, ho nune’e bee labele tama ba tanki laran, razaun ne’e tanba komunidade sira mós halerik ba bee moos hotu.

“Bee moos prinsipalmente mai ami, ba alunos sira, ba saude nian di’ak tenki iha bee, kada semana rua ka tolu mak ami bele fase sintina tanba bee laiha”, konfesa Diretór EBC Postu Balibo.

Diretor EBC rekomenda ba Ministeriu Edukasaun, karik iha orsamentu ba edukasaun ba tinan oin aumenta tan, sira husu atu orsamentu ba professores sira nian transporte professor sira halo vijilansia, ba eskola ida dook tebes, agora ezame nasional hotu ona, professor sira husu osan mina nian, nudar diretór labele halo buat ida, tanba osan laiha.

Tuir Postu- Administradór Balibo, Rosario Gonçalves hateten, Durante husi tinan 2007 to’o mai agora, orsamentu ba kapital dezenvolvimentu laiha, espera katak tinan 2020 mai iha orsamentu haree ba iha dezenvolvimentu edukasaun iha Balibo.

“Ami presiza loke tan eskola iha Badut-Mean iha kedas fronteira ho indonezia, tanba labarik barak mak iha ne’eba, entaun presiza tebes loke tan eskola iha ne’eba, Durante ne’e ami hatama ona proposta ba Ministeriu Edukasaun atu loke tan eskola, maibé seidauk hetan resposta”, hateten Postu- Administradór Balibo.

 

LEAVE A REPLY

Please enter your comment!
Please enter your name here