Home Notisia OGE 2020, Oxfam Preokupa ho Setor Agrikultura, Inkluzaun no Dereitu ba Rai

OGE 2020, Oxfam Preokupa ho Setor Agrikultura, Inkluzaun no Dereitu ba Rai

271
0

Reportajen Francisco JDA

Oxfam preokupa ho setor agrikultura, inkluzaun ema ho defisiensia no direitu ba rai iha OGE 2020 nian. Oxfam mos nota katak OGE 2020 sei la garante asesu direta agrikultór sira nian ba merkado. Expresaun ne’e Oxfam hato’o liu hosi nia submisaun ba Parlamentu Nasional, 13/11.

Iha parte agrikultura no asesu ba merkadu lokal, Oxfam Timor-Leste hakarak hato’o parabens ba Governu Konstituisional daualuk (VIII) Timor-Leste ne’ebe mak aumenta ona orsamentu husi miliaun USD 14.9 iha 2019, ba miliaun USD 21.5 iha 2020 ba iha Ministeriu Agrikultura nian. Oxfam husu ba Governu asegura katak aumenta alokasaun orsamentu ba agrikultura, sei fo benefisiu direta ba komunidade agrikultor feto no mane nebe mak vulnerabel no kiak liu.

Iha submisaun ne’e, Oxfam sita lider feto ida iha Viqueque, Domingas Guterres, sente laran susar tebes tamba la bele asesu ba estrada atu bele faan sira nia produtu lokal.

“Ami kuda barak maibe susar atu hetan osan  ba ami nia produtu ami la iha asesu ba iha merkadu tamba dalan at no transporte publik la iha. Produtu sira ami han deit no mos fo han ami nia fahi,” dehan Domingas.

USD 1 million hosi total OGE ba Ministeriu Agrikultura aloka ba hasae asesu ba merkadu, maibe sei uza deit ba subsidiu ba transportasaun produtu agrikula, dezenvolve asosiasaun agrikultura sira, quarantena no standar seguru nian. Ne’e sei la garantia asesu agrikultór sira ba merkadu. Oxfam nota katak item orsamentu ida ne’e la fo benefísiu direta ba agrikultór. Tanba produtu agrikultór sira sei to’o deit iha asosiasaun agrikultór sira, depois transporte ne’ebe mak subsídiu hosi governo sei ba tula iha asosiasaun sira nia fatin. 

Orsamentu ba 2020 inklui mos proposta miliaun USD 10 husi Ministeriu Obras Publika ba rehabilita 25 estradas rural sira. Maski nune’e, seidauk klaru estradas ida ne’ebe mak sei tama ba prioridade no estrada hirak ne’e sei fo impaktu ekonómiku ba komunidade agrikultor iha rural ka lae.

Iha parte, Inkluzaun Ema ho defisiénsia Oxfam hakarak fo parabens ba Governu Timor Leste, foin lalais halo aprovasaun unânime da Rezolusaun n.º/V (2.ª) kona ba promosaun no protesaun ba ema ho defisiensia. Oxfam husu ba Governu atu adopta mekanismu alokasaun orsamentu mak apropriadu ba tinan 2020-2021 ba ema ho defisiensia no garante dezenvolvimentu inklusivu iha Timor-Leste.

Oxfam kontinua preokupa ho ema nia dereitu ba rai, liliu sidadaun sira mak vulneravel liu. Governu nia kontratu ho GMN-H no ARM-Apprize sei termina iha Dezembru 2019. Oxfam husu ba Governu atu hahu halo avaliasaun lalais no independentemente kona ba SNC antes Dezembru 2019, liuliu foka ba prosesu resjistrasaun, konflitu potensial relasaun ho rai iha Timor Leste, impaktu ba ema sira mak vulneravel liu.

LEAVE A REPLY

Please enter your comment!
Please enter your name here