Home Meio Ambiente Estudante Sira Halo Expozisaun Resiklazen Plastik ba Arte Kreativu

Estudante Sira Halo Expozisaun Resiklazen Plastik ba Arte Kreativu

745
0
Expozisaun Arte Kreativu (Foto: Adroaldo Serutukau)

Reportajen Adroaldo “Serutukau”

Estudante UNTL no grupo joven Klibur Badaen Tradisional halo resiklazen ba plástiku sai arte kreativu. Saida mak sira produs fo mensajen ba publik atu kuidade meioambiente maibe mos bele hamosu oportunidade atu hetan osan. Sira halo expozisaun ba sira nia arte kreativu iha Liceu, loron hirak liubá, 9/11.

Jerente Sentru Lian Inglés UNTL, Belinha Maia do Rosario, hato’o kona ba intensaun hosi expozisaun ne’e ne’e mak atu hasae konsiensia komunidade nian atu kuidadu ambiente.

“Objetivu hosi espozisaun ida ne’e mak hakarak atu hasa’e konsiénsia komunidade públiku ni-nian, oinsá mak atu kuidadu ambiente hosi hahalok labele soe fo’er arbiru, liu-liu plástiku sira. Apartir ida ne’e mós ami hakaraka atu fó mensajen ba públiku sira katak plástiku sira ne’e mós bele sai ameasa ba ita ema nia saúde, tan ne’e mak atu hatete ba sira oinsá mak atu uza plástiku ho loloos, wainhira atu soe karik bele soe iha nia fatin, labele soe arbiru atu nune’e labele sai ameasa mós ba ita nia tasi,” Belinha hato’o.

Nia mos dehan katak iha espozisaun ida ne’e hosi UNTL sentru lian Inglés konvida grupu hamtutuk rua nulu resin rua, hanesan Delicious, Agora Food Studio, Estudante UNTL nomós iha grupu barak mak hanesan Raga, Ale-Ale Craft, iha Grupu hosi UNDP, Guterres creativity no seluk tan. Sira mai ho sira nia produtu ne’ebé halo hosi plástiku.

Xefe Grupu Grupu Klibur Badaen Tradisional Lixu Ale-Ale Timor, Luis da Silva Amaral, expresa sira nia kriatividade oioin iha expozisaun ne’e. Grupo ne’e mos konsege hetan osan balun hosi faan sasan kreativu sira.

“Ami hosi Grupu Klibur Badaen Tradisional Lixu Ale-Ale Timor. Sasan ne’ebé ami halo mak primeriu, halo rekollamentu konabá lixu no foku liu ba iha Ale-Ale (modelu kopu), lori mai ami ko’a, hotu ami fase no ami homan. Rejultadu hosi homan ne’e mak bele sai ba raga, bele sai ba bote, bele sai ba bikan, bele sai ba Xapeu. La’os ne’e de’it maibé moxila ba forsa nian mós ami halo, sintu, kurtina sira, kopu sira, “ Luis esplika.

Luis mos dehan katak sasan barak ne’ebé ami halo hosi inisiativa ami nian rasik. Ami la hetan treinamentu ka suporta ruma hosi NGO ka Governu. Ida ne’e inisiativa ami nian, tanba ami haree katak lixu iha sidade Díli ne’e barak tebes, tan ne’e ita bele hamenus ona fo’er iha sidade Díli.

Grupo hetan parseiru ho UNDP liu hosi Knua Juventude Fila-Liman, sira fó dalan mai ami, depois ami fa’an. Ami fa’an iha fatin bar-barak hanesan Timor Plaza, Pateo. Ami fa’an mós iha merkadu lokal sira hanesan Glenu, Aileu, Maubisse, no ema mós ba sosa iha ami nia fatin. Barak liu mak turista sira hosi Ataúru, restaurante na’in iha Ataúru, sira mak sosa barak. Iha fulan outubru atu tama ba fulan finadu nian, ha’u bele dehan ema sosa ami nia produtu to’o dolar atus lima. Ema sosa barak liu mak raga tanba atu tau ai-funan hodi ba vizita sira nia família matebian sira, ne’ebé rendimentu ne’e boot.

La’os ida ne’e de’it maibé grupo ne’e mós halo ona esportasaun ba rai li’ur, iha kompañia ida naran Sia Golding iha Bebonuk mak sosa barak. Kompañia refere sosa sasan oi-oin ne’e hamutuk tolu nulu no halo ona esportasaun ba Singapura no Malaisia.

Aktividade ida ne’e, hosi inísiu mosu hosi diskusaun UNTL Sentru Lian Inglés nian kada sabadu. Hosi diskusaun ne’e, ami hosi Sentru Lian Inglés hamutuk ho ami nia voluntáriu Australianu nian IBI mak mai ho inisiativu ida katak hakarak halo espozisaun. Konabá suporta máksimu mai hosi Sentru Lian Inglés nomós ami nia Voluntáriu Australianu.

Print Friendly, PDF & Email

LEAVE A REPLY

Please enter your comment!
Please enter your name here